Kryetari i Prishtinës, Shpend Ahmeti, ka thënë se tubimet me qytetarë të politikanëve nuk mund të mbahen në shkolla. Ai ka thënë se drejtorët e shkollave po kanë presion nga shtabet për tubime.
“Drejtorët e shkollave dhe drejtoria e Arsimit kanë lajmëruar që kanë presion nga shtabet për me i leju tubimet me qytetarë brenda në shkolla për shkak të shiut. Përgjigja është JO! Zgjedhjet po mbahen në kushte të jashtëzakonshme. Sipas udhëzimeve çfarëdo grumbullimi i qytetarëve në hapësira të mbyllura duhet të kufizohet”, ka shkruar Ahmeti në Facebook.
Ahmeti ka shtuar se nuk duhet rrezikuar shëndeti i fëmijëve të cilët janë rikthyer në shkolla, ndërsa tha se çdo shkelje e masave do të pasohet me dënime.
“Edhe më tutje tubimet në vende të hapura lejohen vetëm me masat e marra nga Qeveria. Sikurse edhe në zgjedhjet nacionale nuk do të hezitojmë në shqiptimin e dënimeve”.
