Shefi i mbrojtjes së Letonisë, Leonids Kalnins, ka thënë të martën se qëllimi i njerëzve që sulmuan trupat letoneze të KFOR-it në veri të Kosovës ishte që t’i zvogëlonin aktivitetet e paqeruajtësve.
Në një intervistë për “Baltic Times”, Kalnins nuk beson se pas këtij sulmi është rritur niveli i kërcënimeve ndaj paqeruajtësve letonezë. Shtoi se do ta vazhdojnë misionin e tyre.
“Pavarësisht incidentit, ushtarët letonezë do të vazhdojnë misionin e tyre, duke përfshirë patrullimin. Qëllimi ynë është të kryejmë detyrat tona në tërësi së bashku me aleatët tanë. Një incident i tillë nuk mund të na frikësojë ta kuptojmë se ku do të ndalonim papritmas përmbushjen e misionit tonë. Mendoj se qëllimi i sulmuesve ishte t’i zvogëlonin aktivitetet tona midis dy palëve në konflikt. Detyra e Forcës Ndërkombëtare të Sigurisë (KFOR) është të zbusë tensionin. Me shumë mundësi, një nga objektivat e këtij provokimi ishte heqja e bllokadave në rrugë, në mënyrë që njerëzit të lëviznin më lirshëm", ka thënë Kalnins.
Ushtarët e kontingjentit letonez të KFOR-it u sulmuan në veri më 25 dhjetor teksa ishin duke kryer patrullime. Pas kthimit të tyre në bazë, u konstatua se asnjë nga dy makinat e patrullës nuk ishin dëmtuar.
Veriu i Kosovës ka ngelur i bllokuar nga 9 dhjetori, kur serbët për ta kundërshtuar arrestimin e ish-policin Dejan Pantiq, vendosen mbi 13 barrikada në lokacione të ndryshme në veri. Pantiqi po dyshohet se organizoi sulmet ndaj komisioneve komunale zgjedhore.
Gjatë ditës së hënë, Bashkimi Evropian (BE) dhe KFOR-i kanë kërkuar që të hiqen barrikadat në veri.
© KOHA. Të gjitha të drejtat janë të rezervuara.
