Shefja e Grupit Parlamentar të Lëvizjes Vetëvendosje, Mimoza Kusari-Lila, i ka konsideruar kërkesat e Bashkimit të Sindikatave të Pavarura si politika madhore, për të cilat ajo thotë se mund të përcaktojnë edhe punën e një qeverisjeje katërvjeçare. Kusari-Lila thotë se nuk mund të vendoset ultimatum për t’i plotësuar këto kërkesa.
Shefja e GP të VV-së theksoi në “60 Minuta” të KTV-së të premten se nga grevat pasojat më të rënda po i bartin fëmijët. Ajo bëri thirrje që forma e pakënaqësisë nga mësimdhënësit të shprehet në mënyra të tjera.
“Viktima dhe gjegjësisht ata që po i bartin pasojat janë fëmijët. Fëmijët nuk kanë të bëjnë me përkatësi politike. Janë ata që pasojat e problemeve për mësim do t’i kenë afatgjata. Kjo si dukuri duhet t’i thërrasë ndërgjegjes së secilit që mund të ketë tjetër zgjidhje për shprehje të pakënaqësisë. Megjithatë, kërkesat e grevistëve janë tri politika madhore në secilin vend. Të vendoset një ultimatum për këto politika madhore që e karakterizojnë një qeverisje për katër vjet, është e tepërt. Është ngarkesë shumë e madhe. Qeveria ka treguar vullnet për ta trajtuar dhe për të bërë pjesë sindikatat në draftimin e të gjitha këtyre vendimeve”, ka thënë ajo.
BSPK-ja po kërkon shtesë 100 euro në muaj deri në miratimin e ligjit për paga, plotësim/ndryshimin e ligjit për pensionet dhe miratimin e sigurimeve shëndetësore. Pavarësisht dialogut me Qeverinë, ende nuk është arritur marrëveshja për të dalë nga greva e filluar më 25 gusht.
Për plotësim/ndryshimin e Ligjit për skemat pensionale, për të cilin Aleanca për Ardhmërinë e Kosovës akuzoi VV-në se ka ndërruar qëndrim në pushtet, Kusari-Lila ka thënë se pajtohen që ky ligj është diskriminues, por sipas saj duhet të ketë reformë të mirëfilltë.
“Jemi në të njëjtin qëndrim. Ky ligj është diskriminues. Baza e problemit është te fondi i vjedhur në Serbi. Atë që Serbia e ka përvetësuar jashtëligjshëm. Duhet të ketë një qasje më holistike. Kërkojmë që në kuadër të kësaj të kemi mbështetjen edhe të opozitës. Ne e kemi sjell dy herë në Kuvend marrëveshjen ndërkombëtare për skemat pensionale, por është rrëzuar. Duhet një reformë e mirëfilltë. Saktë dhe qartë të përcaktohen të gjitha skemat në një regjistër”, ka shtuar Kusari-Lila.
