Arbëri

Nga dhjetëra mijëra euro në vitin 2013, në miliona euro në vitet e fundit për spitalet turke

Pjesa më e madhe e buxhetit të Programit për Trajtim Jashtë Vendit ka shkuar për fëmijët, sidomos për ata me sëmundje të rënda. Paratë për trajtimin e këtyre patologjive te fëmijët janë rritur nga viti në vit, por nga Klinika e Pediatrisë thonë se trendi i sëmundjeve të rënda te fëmijët, për 10 vjet, nuk ka shënuar ndonjë rritje të madhe. Dyshime për këtë fond ka ngritur edhe Bordi ekzekutiv në Programin për Trajtim Jashtë Institucioneve Pubike, i cili ishte në detyrë në vitet 2020-2021
 
Ky tekst është Premium por sot mund ta lexoni pa pagesë!

Programi për Trajtim Jashtë Institucioneve Publike funksionon qe gati dy dekada, por rritja e parave nga ky program ka ndryshuar dukshëm në 5 vjetët e fundit. Gjatë hulumtimit disamujor, KOHA ka analizuar se ku kanë përfunduar këto para. Nga të dhënat e siguruara del që spitalet turke që në vitin 2013 kishin dhjetëra e mijëra euro pagesa nga ky fond, në vitet të ardhurat i rritën në miliona euro. Shumica e parave kanë shkuar për trajtimin e sëmundjeve të rënda te fëmijët. Përderisa shpenzimet janë rritur, në QKUK thonë se nuk kanë vërejtur rritje të rasteve.

Në mënyrë drastike kanë ndryshuar, nga viti në vit, adresat ku kanë përfunduar paratë e Programit për Trajtim Jashtë Vendit.

Përderisa një pjesë e madhe e parave deri në vitin 2015 ishte shpenzuar në Kosovë, kryesisht për shpenzime të sëmundjeve kardiologjike, nga viti 2016 ka filluar lëvizja e madhe e parasë për në Turqi.