Ardian Gola, kandidat i Lëvizjes Vetëvendosje për kryetar të Gjakovës, e ka quajtur paradoksal koalicionin mes AAK-së që është në pushtet në këtë qytet dhe LDK-së.
Ai në emisionin “Zgjedhjet në KOHË”, ka thënë se LDK-ja si parti opozitare që ishte, gjithë fushatën e ka bërë duke e kritikuar Gjinin dhe AAK-në.
“Kjo vetëm sa na ka mobilizuar. Ne po komunikojnë me qytetarë dhe ata nuk janë aspak të kënaqur me këtë koalicion të arritur, sepse qytetarët po e shprehin nevojën për ndryshim, 52.5 për qind kanë dalë që duan ndryshimin e qeverisjes. Dhe çfarë ndodhë? Partitë që gjatë tërë fushatës elektorale e kanë kritikuar ashpër z. Gjini për politikat e tij mjedisore, infrastrukturore, urbane e të tjera, rreshtohen përkrah tij”, ka thënë Gola.
Ai ka thënë se ka insistuar për koalicion me LDK-në, edhe për faktin se ishte parti opozitare dhe edhe ajo, sipas tij, kërkonte ndryshim të qeverisjes.
Biseda ka thënë se ka pasur edhe me PDK-në.
“Me PDK-në kemi pasur disa biseda jo fort të strukturuara, më shumë spontane. Unë e kam shprehur vullnetin, por them të drejtën prej PDK-së nuk kam pritur shumë për shkak se PDK-ja është aleate tradicionale e AAK-së në Gjakovë. Prandaj nuk ka qenë insistimi shumë i madh. Insistimi ka qenë për LDK-në”, ka thënë Gola.
Sipas tij, ky koalicion e forcon pozitën e tij para rundit të dytë më 9 nëntor.
“Ky fakt na forcon, pasi të gjithë po bëhen bashkë kundër ndryshimit, ndërkohë që LVV-së i mbetet koalicioni me qytetarët për ndryshim”, ka thënë Gola.
Gola i LVV-së: Unë prij në çdo vendvotim në qytet, sidomos në lagjen ku jetojmë unë e Gjini
Kandidati i Lëvizjes Vetëvendosje për kryetar të Gjakovës, Ardian Gola, ka thënë se ai dhe subjekti i tij politik, kanë reflektuar pas rundit të parë të zgjedhjeve lokale, që atë dhe LVV-në e nxori të dytën pas Ardian Gjinit të AAK-së.
Gola në emisionin “Zgjedhjet në KOHË”, ka thënë se qëllim i tij dhe i partisë në këto ditë të fushatës për balotazh mbetet zgjimi i masës së "fjetur" elektorale.
Tek ka komentuar rezultatin e 12 tetorit, ka thënë se në qendrat e votimit në qytet prin në të gjithat para Gjinit të AAK-së e në fshatra qëndron më keq se kundërkandidati.
Po ashtu ka thënë se në lagjen ky të dy jetojnë, ka dalë para Gjinit.
“Në qytet unë prij me diku 1500 vota para z. Gjinit, sidomos te pjesa e Bllokut të Ri, aty ku e kam shtëpinë edhe unë edhe z. Gjini. Në çdo shkollë në qytet unë prij. Gjini më ka ikur jashtëzakonisht shumë në fshatra”, ka thënë Gola.
Balotazhi do të zhvillohet më 9 nëntor.