Një letër për nisjen e ndërmjetësimit mes Bashkimit të Sindikatave të Pavarura të Kosovës dhe Qeverisë së vendit i ka shkuar kryeministrit Albin Kurti të premten. Yll Zekaj, ndërmjetësues i licencuar, ka kërkuar në emrin e BSPK-së nga Kurti që të konfirmojë interesimin për fillim të ndërmjetësimit në tri kërkesat e BSPK-së. Kryeministri ka kohë 15 ditë që të përgjigjet.
Sindikalistët e Kosovës po kërkojnë vazhdim të pagesës prej 100 euro për çdo muaj deri në fillim të zbatimit të Ligjit të Pagave, në të cilin kanë kërkuar të merren parasysh propozimet e Federatave Sindikale anëtare të BSPK-së; fillimin e zbatimit të Ligjit për Sigurimin Shëndetësor; dhe ndryshimin e Ligjit për Skemat Pensionale të Financuara nga Shteti, konkretisht për pikën që kërkon 15 vjet kontribut në skemat pensionale para vitit 1999.
Ditë më parë sindikalistët protestuan duke përsëritur kërkesat. Pati edhe greva njëorëshe. Në vazhdimësi krerë të Sindikatës së Bashkuar të Arsimit, Shkencës e Kulturës, një prej sindikatave më të fuqishme në vend, kanë paralajmëruar se grevat njëorëshe të javëve më parë duhet të shihen si alarm shtesë për Qeverinë se do të ketë greva të mëdha deri në realizim të kërkesave. Si hap i fundit para grevave shihet ndërmjetësimi.
“Në cilësinë e ndërmjetësuesit të propozuar nga ana e BSPK-së, përmes kësaj kërkese e konform nenit 6 paragrafit 4 pika 1, të Udhëzimit Administrativ MD-nr. 05/2021 për përcaktimin e procedurës së ndërmjetësimit të vetinicimit të rasteve të referuara nga organi administrativ, kërkoj nga ana juaj, që të konfirmoni interesimin e Qeverisë për fillimin e ndërmjetësimit në kërkesat e adresuara nga ana e BSPK-së”, thuhet në letrën që ka siguruar KOHA.
I kontaktuar nga KOHA, Zekaj ka thënë se me rregulloren për ndërmjetësim duhet të pritet 15 ditë. Ai ka thënë se “nëse pas 15 ditësh nuk ka përgjigje, atëherë i bie që s’ka vullnet për ndërmjetësim”.
“Ne jemi vetëm lehtësues të procesit, për hapat tjerë vendosin palët”, ka thënë Zekaj.
Për hapa tjerë s’ka pranuar të flasë as Atdhe Hykolli, kryetar i BSPK-së. Ai ka thënë se ka shpresë që do të ketë përgjigje nga Qeveria.
KOHA ka dërguar pyetjet në adresë të Zyrës së Kryeministrit të premten pasdite.
Ligji i Pagave ka muaj që është paralajmëruar se do të shkojë në Kuvend për shqyrtim. Ai fillimisht qe miratuar në fillim të vitit 2019, por në fundvit Gjykata Kushtetuese pati vlerësuar se ligji s’është në përputhshmëri me 11 nene të Kushtetutës. Më pas kanë nisur ndryshimet në kuadër të koeficienteve, ndërsa sindikatat janë ankuar se zëri i tyre nuk është dëgjuar në procesin e hartimit.
© KOHA. Të gjitha të drejtat janë të rezervuara.
