Hysni Gucati arrin në Kosovë “për arsye familjare”
Ish-kreu i Organizatës së Veteranëve të Luftës të UÇK-së, Hysni Gucati, ka arritur të enjten në Kosovë për një vizitë familjare, kanë konfirmuar nga Gjykata Speciale.
Sipas përgjigjes së Speciales për KOHËN, Gucati ka pasur “arsye bindëse humanitare” për t’iu lejuar vizita në Kosovë.
“Trupi Gjykues ka udhëzuar sekretarin që ta menaxhojë vizitën e Gucatit në Kosovë për të takuar familjen e ngushtë. I akuzuari mbetet në paraburgim nga Dhomat e Specializuara. EULEX-i dhe Policia e Kosovës po mbështesin Dhomat e Specializuara të Kosovës”, thuhet në njoftimin e Gjykatës Speciale.
Gucati u arrestua më 25 shtator të vitit 2020 prej kur edhe po qëndron në paraburgim në Hagë.
Rrjedhja e disa dokumenteve që dyshohet të jenë të Speciales, të cilat nga persona të panjohur janë dërguar në zyrat e OVL-UÇK dhe bërja publike e tyre nga krerët e organizatës, është arsyeja pse po gjykohet Gucati së bashku me Nasim Haradinajn.
Mbi ta rëndojnë akuzat për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, frikësim të dëshmitarëve, hakmarrje dhe shkelje të fshehtësisë së procedurës.
Më 18 maj do të shpallet aktgjykimi në rastin ndaj Gucatit dhe Nasim Haradinajt.
