Infermierë, mami dhe profesionistë të tjerë shëndetësorë të sektorit publik, të martën në mëngjes kanë mbajtur grevë njëorëshe para drejtorisë së Shërbimit Spitalor Klinik Universitar të Kosovës.
Kërkesë kanë pasur rritjen e koeficientit të pagave në 7.1, pagesën e ndërrimit të natës nga 18 në 36 euro si dhe pagesën e ditëve të punës në festa dhe vikende.
Protestën e ka organizuar Sindikata e Infermierëve, Mamive dhe Profesionistëve të tjerë shëndetësorë.
Elirat Duraku nga kryesia e Sindikatës së Infermierëve tha se kërkesat e këtij komuniteti shëndetësor nuk janë luksoze dhe janë kërkesa të cilat nuk janë realizuar që nga paslufta.
Duraku shpalosi kërkesat e infermierëve dhe mamive që veprojnë në ShSKUK, ndërsa theksoi se me këto kërkesa janë të njoftuara të gjitha institucionet.
“Komuniteti i infermierëve, mamive dhe profesionistëve tjerë shëndetësorë që nga paslufta nuk dinë asnjë kërkesë të realizuar as në kuptim të rregullimit të kushteve të punës e lëre më në rregullimin e mirëqenies sociale. Kërkesat e komunitetit mami, infermierë dhe profesionistë shëndetësorë janë kërkesa bazike dhe nuk janë kërkesa luksoze. Kërkesë është rritja e pagesës së ndërrimeve të natës duke u mbështetur në rritjen e kostos së shpenzimeve. Një pagesë e tillë që e quajmë për ndërrim të natës prej 18 eurosh nuk i mjafton infermierit sidomos atyre që udhëtojnë nga regjione të ndryshme. Kërkesa tjetër është respektimi i Ligjit të Punës, pagesat e menjëhershme të rrezikshmërisë në punë, të punës gjatë vikendeve dhe festave si dhe pagesa shtesë për komunitetet tona”, tha ai.
Infermierët kanë kërkuar që të rikthehet departamenti i Infermierisë pranë QKUK-së dhe po ashtu të kenë një anëtar në Bordin e SHSKUK-së.
Duraku u shpreh se nëse nuk realizohen kërkesat e tyre do të përshkallëzojnë veprimet sindikale.
“Absolutisht kjo as që vjen në diskutim, ne prapë do të konsultohemi me Këshillin grevist dhe organet e kryesisë së Sindikatës në mënyrë që të dakordohemi për veprimin tjetër të radhës e i cili veprim sigurisht që do të shkojë me përshkallëzim të aktiviteteve sindikale deri në realizim të kërkesave tona”, tha Duraku.
Ndërkohë sipas Fitim Havollit, punëtor shëndetësor, kërkesat e infermierëve janë minimale dhe lehtë të realizueshme.
Ai ngriti alarmin se për shkak të mosrealizimit të këtyre kërkesave dhe mostrajtimit të dinjitetshëm, siç tha ai, infermierë të shumtë po ikin nga Kosova.
“Do të doja t’i bëja apel kësaj Qeverie dhe gjithë skenës politike që vërtetë t’i merr parasysh këto kërkesa të cilat nuk është që nuk mund të realizohen. Kjo shëndetësi, ky komunitet sivjet sipas informatave që i kemi vazhdimisht kanë ikur nga vendi për mostrajtimin e tyre të dinjitetshëm. Tash e kam informatën se dyfishi i tyre do të ikë nga vendi për shkak të këtij trajtimi dhe mosrealizimit të kërkesave tona për vite që kemi bërë e realisht ato kërkesa janë minimale jo për të jetuar por për të mbijetuar ky komunitet”, deklaroi Havolli. /Ksp
