Shtrëngimin e mëtejmë të masave në institucionet e arsimit fillor e parafillor e ka përjashtuar Ministria e Arsimit, Shkencës, Teknologjisë e Inovacionit.
Me gjithë numrin gjithnjë e më të madh të infektimeve te fëmijët, zëvendësministri Dukagjin Pupovci ka thënë se mbyllja e shkollave nuk është zgjidhje.
“Masa shtrënguese të tjera përveç respektimit të masave ekzistuese dhe vaksinimit nuk ka. Një masë radikale mund të jetë mbyllja e shkollave për një periudhë të caktuar, por nuk shohim që në këtë formë zgjidhet ndonjë problem përveç që dëmtohen fëmijët sepse ata përsëri do të kthehen në shkollë pas dy javësh, tri javësh dhe në për dy ose tri javë të tjera nuk do të mund të fusim masa të reja përveç distancës, maskave dhe ftesës për vaksinim”, ka thënë ai.
Derisa u ka bërë thirrje të gjithë personave mbi 12 vjeç të vaksinohen, ai ka treguar se një numër i madh i rasteve pozitive me virus janë regjistruar edhe sot te nxënësit.
“Sa i përket rasteve të infektimit dje kanë qenë 420 mësimdhënës dhe 66 anëtarë të personelit, aktualisht të infektuar, ndërsa nga radhët e nxënësve kemi pasur 1913 nxënës. Më duhet t’iu them që rezultatet që kanë dalë pasdite kanë sjellë të dhëna të reja pastaj se e kemi vërejtur se në grupmoshën 10-19 janë pothuajse 900 persona dhe mendojmë që shumica prej tyre do të duhet të ishin nxënës qoftë në shkollat e mesme të ulëta ose në të mesme të larta”, ka njoftuar më tej ai.
Prishtina ka numrin më të madh të rasteve të nxënësit 974, derisa mbi 100 janë në Pejë, Mitrovicë, Gjakovë.
Nga të dhënat e së enjtes, sipas Pupovcit, nga 781 shkolla në nivel vendi, 15 vijojnë mësimin online.
Duke qenë që MASHTI nuk informohet për çdo ditë për numrin e rasteve, sipas zëvendësministri Pupovci, ky institucion synon ndërtimin e një sistemi online në të ardhmen nga e cila ministria dhe publiku mund të informohet për numrin e të infektuarve në arsimin parauniversitar.
© KOHA. Të gjitha të drejtat janë të rezervuara.
