3 perditesime
23:47

Beka: Zjarrfikësit, heronjtë e diskriminuar nga të gjitha qeveritë

Kryetari i Sindikatës së Zjarrfikësve, Muharrem Beka, vlerëson pushtetet kanë nënvlerësuar rolin e tyre dhe kanë injoruar çdo kërkesë tash e 10 vjet.

Beka, i ftuar në Interaktiv, tha se durimi i zjarrfikësve është sosur dhe ka paralajmëruar protesta.

Ai thotë se injorimi i zjarrfikësve nga qeveritë, njëra pas tjetrës, ka qenë i vazhdueshëm.

“Që nga viti 2012 kur kaluam në kuadër të Ministrisë së Brendshme kemi nisur t’i artikulojmë problemet. Me të gjitha qeveritë kemi biseduar. Së fundi kemi biseduar edhe me ministrin e Brendshëm Xhelal Sveçla, na premtoi se do të merren parasysh kërkesat tona, por në fund e pamë se në rishikim të buxhetit nuk u përfshimë. Kjo ka zhgënjyer tej mase zjarrfikësit që punojnë në kushte tejet të rënda. Jemi të diskriminuar nga të gjithë dhe në raport me të gjithë. Pagat tona janë më të ulëtat, ndërkohë që sa herë takohemi na quajnë heronj të gjallë”, ka thënë Beka.

Ai tha se kjo situatë çfarë po kalon vendi nuk është e përshtatshme për protesta, por nuk i ka përjashtuar ato.

“Ne jemi të diskriminuar edhe me ligj, na ndalohet greva. Në jemi reagimi i parë jo vetëm për zjarre, por edhe në aksidente, vërshime, tërmete, bllokime e të tjera, por në fund jemi ku jemi, të diskriminuar”, tha ai.

Beka foli edhe për pagat, që ndryshojnë nga komuna në komunë. Në disa komuna pagat bazë shkojnë në 320 euro, e në disa të tjera 286.

23:29

Beka: Na kanë lënë në situatë të padefinuar, jemi të diskriminuar në të gjitha rrethanat

Kryetari i Sindikatës së Zjarrfikësve të Kosovës, Muharrem Beka ka thënë se është për t’u habitur se si qeveritë nuk i kanë dhënë rëndësi zhvillimit të kapaciteteve të zjarrfikësve.

Ai ka shtuar se kanë deklaruar vazhdimisht që është e vështirë të vazhdohet kështu.

Beka ka thënë se ka nuk ka buxhet të planifikuar për ta, as nga niveli komunal e as ai qendror.

“Ne kemi mbetur në situatë të padefinuar. Nuk e di nëse ndodhë kështu në vende të tjera. Duhet koordinim dhe bashkërendim mes nivelit qendrorë dhe lokal. Zjarrfikësit janë të diskriminuar në të gjitha rrethanat”, ka thënë ai.

23:24

Beka: Zjarret, 99 për qind janë të shkaktuara nga faktori njeri

Kryetari i Sindikatës së Zjarrfikësve, Muharrem Beka, vlerëson se zjarret që kanë përfshirë vendin, sipas të gjitha gjasave, janë të shkaktuar nga faktori njeri.

Beka në një intervistë në Interaktiv të KTV-së, tha se temperaturat e larta që po mbretërojnë ndihmojnë zjarrin, por dyshon se zanafilla e problemit është diku tjetër.

“Temperaturat e larta ndihmojnë, por vlerësojmë se 99 për qind e rasteve të zjarrit janë të shkaktuar nga faktori njeri. Harta e zjarreve na lë për të kuptuar këtë. Kjo bëhet nga pakujdesia ose për qëllime të tjera. Nuk mund të ketë ndezje të zjarrit natën e të mos jetë faktori njeri fajtor. Është vështirë të identifikohen keqbërësit, mund të jenë kalimtarët, mjafton një cigare. Këto janë zjarre të qëllimshme”, ka thënë Beka.

23:18

Beka: Numri i vogël i zjarrfikësve rrezikon menaxhimin e situatës me zjarre

Kryetari i Sindikatës së Zjarrfikësve të Kosovës, Muharrem Beka, ka thënë se zjarret e fundit kanë vënë në pah problemet e organizimit dhe shërbimit të zjarrfikësve në Kosovë.

Ai ka thënë se ka numër të vogël të zjarrfikësve dhe mosha mesatare e zjarrfikësve është mbi 48 vjeçare.

Ai ka shtuar se kanë edhe mungesë të pajisjeve.

Beka ka thënë se zjarre më të theksuara ka pasur në Pejë, Suharekë, Gjilan e komuna tjera.

“Zjarret fushore sapo futen në kontroll dalin nga kontrolli. Nëse vatra nuk shuhet është paraqet problem. Të gjithë zjarrfikësit janë në terren pasi zjarre ka në të gjitha komunat dhe është problem të menaxhohen sepse ka pak zjarrfikës. Në komunën e Podujevës ka dy zjarrfikës, njëjtë ka edhe në komuna tjera”, ka thënë ai.