2 perditesime
17:51

Gërvalla në KS të OKB-së: Jemi gati të bisedojmë edhe me ata që janë përgjegjës për gjenocidin në Kosovë

Ministrja e Punëve të Jashtme, Donika Gërvalla, u është drejtuar anëtarëve të Këshillit të Sigurimit të OKB-së nga Prishtina, me mesazhin se Kosova është e gatshme të vazhdojë bisedimet me Serbinë, megjithëse kjo e fundit është përgjegjëse për masakrat e gjenocidin ë Kosovë e më gjerë.

“Vendi ynë i vogël, por shumë i veçantë nuk frikësohet. Në të kundërtën, ne do të vazhdojmë bisedimet edhe me ata që janë përgjegjës për konfliktet dhe gjenocidet në Bosnjë dhe Kosovë në dekadat e fundit. Në Republikën e Kosovës gjen njerëz me bujarë dhe me përvojë ndërkombëtare që nuk ngurrojnë të ndajnë eksperiencat e tmerrshme të përjetuara për të gjetur një zgjidhje. Ne jemi të hapur dhe krenar dhe nuk frikësohemi nga asgjë dhe askush. Ne kemi shumë njerëz me përvojë shumë të dhimbshme nga Serbia. Kryeministri ynë, për shembull ishte gjykuar në një gjyq publik sa ishte student nga regjimi serb e që ishte keqtrajtuar nëpër burgjet e Serbisë për dy vjet. Nënkryetarja e Kuvendit të Republikës së Kosovës, mbijetoi një masakre kur ishte 13-vjeçare, një masakër të kryer nga serbët ku u vranë nëna, gjyshja, dy vëllezërit dhe kushërinjtë të tjerë u vranë. Ajo vajzë u gjet me 16 plagë dhe mezi mbijetoi. Një nga deputetët e rinj të Kuvendit me më së shumti vota është dhunuar nga forcat serbe kur ishte vetëm 16 vjeçare. Ajo mori guximin për të tejkaluar barrën dhe foli për përjetimet e saj. Ajo është zëri i mbi 20 mijë grave të dhunuara. Asnjë nga dhunuesit serbë nuk është gjykuar për krimet e kryera.

Mbledhja e Këshillit të Sigurimit të OKB-së po mbahet online. Më herët, përfaqësuesi i Rusisë shkaktoi incident, gjë që bëri të ndërpritet mbledhja për pak çaste. Ai kërkoi nga Gërvalla të largojë flamurin e Kosovë që ishte në prapavijë të saj, por ndërhyri Britania e Madhe.

Ndërkohë, përfaqësuesi i SHBA-së në Këshillin e Sigurimit për Kosovën, ka kërkuar nga Kosova dhe Serbia që të rifillojnë dialogun në Bruksel për përmbylljen e një marrëveshje gjithëpërfshirëse për njohje reciproke.

“SHBA mbështet fuqimisht dialogun e ndërmjetësuar nga BE-ja, tanimë me qeverinë e re të Kosovës, ne mirëpresim planet e përfaqësuesit special të BE-së që të rifillojë dialogu në një të afërme. Është arritur progres nga palët edhe pse mund të mos shihet aty në raportet e këtij mëngjesi, por këto kanë kontribuar në përmirësimin e jetës të qytetarëve në Kosovë dhe në Serbi. Ngjashëm zotimet e dhëna nga Kosova dhe Serbia në SHBA në shtator të vitit 2020 kanë përforcuar themelin e bashkëpunimit ekonomik, zhvillimit dhe normalizimit. Ne besojmë që ka shumë bazë të mirë dhe ka shumë pak kohë për të humbur. Kështu që SHBA inkurajojnë të dyja palët të zbatojnë marrëveshjet e kaluara dhe t’i qasen rifillimit të dialogut në mënyrë pragmatike dhe produktive, me qëllim të arritjes së një marrëveshjeje gjithëpërfshirëse të normalizimit“, tha përfaqësuesi i SHBA-së.

SHBA edhe një herë i rikujtoi UNMIK-ut se roli i tij në Kosovë është përmbushur dhe se tashmë është koha që të përmbyllet misioni i tij.

17:12

Rusia ndërpret mbledhjen e Këshillit të Sigurimit për shkak të flamurit të Kosovës

Mbledhja e Këshillimit të Sigurimit të OKB-së, ku po diskutohet për Kosovën, është ndërprerë për pak çaste pasi kishte nisur, por ka vazhduar pas një pauze të shkurtër, ka raportuar mediumi serb “B92” të martën pasdite.

Mbledhja u ndërpre pasi përfaqësuesi i Rusisë, Dmitry Polyanskiy, kërkoi nga ministrja e Punëve të Jashtme të Kosovës, Donika Gërvalla, që të heqë flamurin e Kosovës në prapavijë të saj.

Sipas Polanskit, Kosova nuk mund të prezantohet me flamur dhe se tetë nga anëtarët e Këshillit të Sigurimit nuk e njohin pavarësinë e Kosovës.

Në këtë ka reaguar përfaqësuesi i Britanisë së Madhe, duke thënë se kjo nuk është një mbledhje zyrtare e Këshillit të Sigurimit ku mund të ndërrohen rregullat dhe se, edhe herën e shkuar, përfaqësuesi i Kosovës u paraqit me flamur të shtetit në prapavijë.

Ndërkohë, ministri i Punëve të Jashtme të Serbisë, Nikola Selakoviq, sipas “B92” ka ushtruar ankesë për këtë, duke thënë se po keqpërdoret video-formati.

Për pezullimin e përkohshëm të seancës ka shkruar edhe platforma mediale nga Pakistani, seksioni anglisht, “Urdu Point”.

Misioni i OKB-së në Kosovë (UNMIK), ka dalë me një komunikatë për mbledhjen, por nuk ka folur për incidentin.

Ka njoftuar vetëm për atë që ka paraqitur shefi i këtij misioni para anëtarëve të Këshillit të Sigurimit, Zahir Tanin. Ai ka folur për procesin zgjedhor të 14 shkurtit, për votimit në masë të VV-së dhe pritjet nga Qeveria e re, Kurti 2.

“Pritjet e shprehura ishin për ndryshim të reagimit të qeverisë ndaj shpresave dhe nevojave reale të votuesve të saj, për barazi më të madhe të mundësive, llogaridhënie, dhe sundim të ligjit. Kësisoj, pritjet anembanë Kosovës do të mbesin të larta siç ishin edhe rezultatet. Hapja e dyerve të së ardhmes kërkon transformim, dhe ndryshim të prioriteteve që pasqyrohen si në fjalë ashtu edhe në vepra. Ulja e tensioneve po ashtu kërkon që partitë në pushtet dhe në opozitë ta dëshmojnë kapacitetin e tyre drejt interesave më të gjerë”, ka thënë Përfaqësuesi Special i Sekretarit të Përgjithshëm, Zahir Tanin.

07:47

Sot mbahet seanca e Këshillit të Sigurimit të OKB-së për Kosovën

Sot në Këshillin e Sigurimit të Kombeve të Bashkuara mbahet mbledhja e radhës për Kosovën, ku do të diskutohet për raportin e periudhës nga shtatori 2020 deri në mars 2021.

Seanca e kryesuar nga Vietnami do të zhvillohet në formatin video për shkak të pandemisë së koronavirusit.

Pritet që të diskutohet për zgjedhjet e parakohshme parlamentare të mbajtura në Kosovë, themelimin e institucioneve dhe aktakuzat nga Prokuroria Speciale në Hagë.

Kurse, Kosovës dhe Serbisë pritet t’i bëhet thirrje për vazhdimin e dialogut në Bruksel.