3 perditesime
13:02

Në Kukës vaksinohen mjekët nga Kosova

Në mënyrë të organizuar me autobusë, punëtorë shëndetësorë kanë shkuar në Kukës për t’u vaksinuar kundër COVID-19. Pallati i Kulturës është kthyer në qendër vaksinimi për Kosovën.

Për të parë nga afër procesin ishte edhe kryeministri i Shqipërisë, Edi Rama, dhe ministrja e Shëndetësisë, ku edhe premtuan se asnjë nga stafi shëndetësor nuk do të mbesë pa u vaksinuar. Rama ka thënë se edhe në arritjen e dozave të tjera do të ketë edhe për Kosovën nëse, ky proces nuk fillon në Kosovë.

Derisa, Blerim Syla nga Federata e mjekëve të Kosovës ka falënderuar kryeministrin dhe shtetin shqiptare për ndihmën që u është ofruar atyre.

Mjekët të cilët vullnetarisht kishin shkuar për t’u vaksinuar kanë falënderuar Shqipërinë duke thënë se lajmet dhe propagandat e ndryshme nuk kanë ndikuar për të mos e marrë vaksinën e AstraZenecas.

Nait Hasani, ambasador i Kosovës në Shqipëri ka thënë se kane marrë konfirmimin se rreth 500 punëtorë shëndetësorë nga Kosova do të vaksinohen këtë vikend, derisa ka shtuar se procesi ka shkuar në rregull.

11:47

Mjekët nga Kosova mbërrijnë në Kukës për ta marrë vaksinën anti-COVID

Kanë mbërritur në Kukës tre autobusët nga Kosova me punëtorë e parë shëndetësorë të cilët do të vaksinohen.

Në pallatin e Kulturës në Kukës, ka filluar regjistrimi i vaksinimit të 250 mjekëve kosovarë. Ndërkohë, që në orën 12:00 pritet të vizitojë qendrën e vaksinimit, kryeministri shqiptar, Edi Rama.

Federata Sindikale e Shëndetësisë së Kosovës ka njoftuar se sot do të vaksinohen rreth 250 punëtorët e parë ndërsa në ditët në vijim do të vazhdohet edhe me 250 të tjerë.

Këto vaksina janë donacion nga Shqipëria./kp

08:59

Vaksinimi i mjekëve kosovarë në Kukës nis në ora 12:00

Rreth 250 mjekë nga Kosova, të cilët punojnë me pacientë të infektuar me COVID-19, gjatë ditës do të vaksinohen me dozën e parë të vaksinës "AstraZeneca" në Kukës.

Vaksinimi i mjekëve do të fillojë rreth orës 12:00.

08:12

Nis sot vaksinimi i punëtorëve shëndetësorë të Kosovës në Kukës

Federata Sindikale e Shëndetësisë së Kosovës ka njoftuar se 250 punëtorë shëndetësorë do të marrin vaksinat anti-COVID sot në Kukës.

FSSHK-ja ka bërë të ditur se në ditët në vijim do të vazhdohet vaksinimi edhe i 250 punëtorëve të tjerë shëndetësorë.

“Delegacioni i FSSHK-së i përbërë nga kryetari Blerim Syla dhe Islam Krasniqi, në prani të ambasadorit të Kosovës në Shqipëri, Nait Hasani, sot kanë zhvilluar takim me Ministrinë e Shëndetësisë të Republikës së Shqipërisë dhe janë dakorduar për çështjet teknike të vaksinimit të punëtorëve shëndetësorë të Kosovës, që do të fillojë nesër në Kukës”, thuhet ndër të tjera në njoftimin e FSSHK-së.

Vaksinimi i punëtorëve shëndetësorë të Kosovës ishte premtim i kryeministrit të Shqipërisë, Edi Rama, pas mbërritjes së mbi 38 mijë dozave të vaksinës AstraZeneca në aeroportin e Rinasit javën e kaluar.