4 perditesime
17:33

LDK-ja cakton datën për mbajtjen e Kuvendit Zgjedhor, “s’ka emra për kryetar të ri”

Lidhja Demokratike e Kosovës më 14 mars do ta mbajë Kuvendin Zgjedhor për kryetarin e ri të partisë.

Sekretari organizativ i LDK-së, Arban Abrashi, ka thënë se kanë filluar përgatitjet për mbarëvajtjen e këtij procesi, ndërsa mohon të jetë diskutuar për emra të kandidatëve.

"Kryetari në dorëheqje i partisë e ka ftuar mbledhjen e kryesisë për përgatitjen e Kuvendit Zgjedhor për kryetarin e ri të LDK-së. Është data 14 mars ku parashihet të mbahet Kuvendi Zgjedhor për kryetarin e ri të LDK-së. Nuk kemi biseduar për emra, ka qenë takim më shumë teknik për datën. Do shohim vullnetin e kryetarëve të degëve, por pamë se 14 marsi është datë më e përshtatshme”, tha Abrashi.

Ai tha se Isa Mustafa ka ofruar dorëheqjen ndërsa se kryesia “është teknikisht në dorëheqje por Këshilli i Përgjithshëm e ka caktuar dhe deri në zgjedhjet e ardhshme qëndrojnë në këto pozita”.

Detaje për takimin s’ka dhënë as Isa Mustafa. Ai ka thënë se tash për tash “s’ka emra për kryetar të ri të LDK-së”.

17:20

Përfundon mbledhja e Kryesisë së LDK-së

Ka përfunduar mbledhja e Kryesisë së Lidhjes Demokratike të Kosovës. Pritet që të ketë një njoftim nga LDK-ja për zhvillimet në Kryesi.

16:17

Abbott takon Mustafën pak para mbledhjes së Kryesisë së LDK-së

Pak para se të nisë mbledhja e Kryesisë së Lidhjes Demokratike të Kosovës, në zyrat e kësaj partie për një takim me kreun e LDK-së, Isa Mustafa, ka qenë ambasadori i Britanisë së Madhe, Nicholas Abbott.

13:10

Në LDK askush nuk ka dhënë dorëheqje, as kryetari Mustafa

Lidhja Demokratike e Kosovës (LDK) nëpërmjet një njoftimi ka reaguar në lidhje me punën e dorëheqjeve nga kjo parti pas rezultatit të dobët të arritur në zgjedhjet e 14 shkurtit.

LDK-ja ka thënë se askush nuk ka dhënë dorëheqje.

Sipas LDK-së, vetëm kryetari Isa Mustafa ka paralajmëruar se do të ofrojë dorëheqje në Kuvendin e partisë kurdo që do të mbahet. Për Kryesinë ka thënë se është me autoritet të plotë.

“Për sqarim të opinionit, Kryesia e LDK-së nuk është në dorëheqje, si e cilësojnë disa media, por me autoritet të plotë deri në riorganizimet që mund të ndodhin pas zgjedhjes së Kryetarit. Vetëm kryetari i LDK-së ka paralajmëruar dorëheqje, të cilën do t’ia ofrojë Kuvendit të LDK-së”, thuhet në komunikatën e Zyrës për Informim të LDK-së.

Në ditën që kryetari Mustafa ka folur për dorëheqjen, nënkryetari Lutfi Haziri i ka thënë KTV-së se e gjithë Kryesia e LDK-së është në dorëheqje.

12:53

Sot mblidhet Kryesia e LDK-së, do të bëhen diskutime për Kuvend

Sot nga ora 16:30 do të mblidhet Kryesia e Lidhjes Demokratike të Kosovës.

KOHA mëson se në këtë mbledhje do të bëhen përgatitje për Kuvendin e LDK-së, ku pritet të zgjidhet Kryesia e re.

Kryesia e Lidhjes Demokratike të Kosovës ka dhënë dorëheqje pas rezultatit të dobët në zgjedhjet e 14 shkurtit.

Ajo doli e treta në këto zgjedhje, duke shënuar rezultatin më të dobët në historinë e kësaj partie. Nga numërimi i votave të rregullta, LDK-ja ka 13 për qind të votave. Deri tash nuk është bërë e ditur se kush do ta marrë pozitën e të parit të kësaj partie.