Baliqi: Dialogu i pashmangshëm, por nuk duhet t'i harxhojmë të gjitha energjitë aty

Bekim Baliqi, politolog, beson se qeveria e ardhshme do të jetë mjaftueshëm e vetëdijshme se dialogu është i pashmangshëm, megjithëse mund të mos jetë prioritet në këtë kohë.

Baliqi në emisionin Desku në KTV, tha se për këtë edhe j anë dhënë sinjalet pas zgjedhjeve të 14 shkurtit.

“Me gjasë është i pashmangshëm dialogu, pavarësisht a na pëlqen apo jo, është prioritet joni apo jo. Edhe nga Bruksesli edhe nga Washingtoni e pamë se sinjalet ishin të qarta, që ata presin që sa më shpejtë të formohet qeveria dhe sa më shpejt të vazhdon dialogu. Duhet të gjetur një lloj bashkëdyzimi i prioriteteve, që dialogu duhet të vazhdohet, por jo e gjithë energjia të kanalizohet aty. Kemi humbur tash e 10 vite shumë energji, shumë kohë, shumë debat, shumë diskutime dhe në fund rezultatet nuk kanë qenë aq të kënaqshme”, ka thënë Baliqi.

Ai beson se edhe në Serbi nuk është ndër prioritetet dialogu, por sipas tij, ka gatishmëri për të vazhduar.

“Njëjtë duhet të vazhdojmë edhe ne. Mendojmë që duhet të dialogojmë për aq sa na kërkojnë, por jo të arrihet një marrëveshje ku ne do të mund të pësojmë, apo të kemi situata të tilla ku detyrohemi të rrëzohet qeveria po diçka tjetër. Besoj se edhe bashkësia ndërkombëtare e ka të qartë kësaj here se një rrëzim i qeverisë nuk do t'i ndihmonte, nuk do t'i sillte një rezultat tjetër. Besoj se presioni nga jashtë nuk do të jetë aq i madh që të kushtëzojë qeverinë me dialog, por besoj që qeveria jonë të jetë e vetëdijshme se dialogu është i pashmangshëm”, ka thënë Baliqi.

Politologu Behlul Beqaj ka thënë se reflektimi i Lidhjes Demokratike të Kosovës do të ishte votimi i Vjosa Osmanit për presidente të Kosovës.

Ai në DESKU-n e Kohës ka thënë se deputetët që do ta përfaqësojnë LDK-në në mandatin e ardhshëm nëse e votojnë Osmanin do të thotë se kanë reflektuar pozitivisht ta pranojnë një gabim.

“Rreth 10 për qind e LDK-së vuajnë nga tiparet e autokracisë dhe ky është defekt serioz. 70 për qind anëtarësisë së LDK-së është e përbërë nga servilët që e kanë sjellë këtë parti në këtë gjendje. Ata mund të mbështesin çdo lloj lideri. LDK-së i nevojitet sot një elitë që ka mendim e fuqi kritike që të mund ta rimëkëmbin këtë parti. LDK-ja brenda 2-3 vjetëve mund të pësojë transformim”, ka thënë ai.

Politologu Belul Beqaj vlerëson se brenda hierarkisë së Lidhjes Demokratike të Kosovës nuk ka gatishmëri për marrje të përgjegjësisë për dështimin në zgjedhje.

Beqaj, në emisionin Desku në KTV, tha se duhet të ndodh një “tërmet i brendshëm” në LDK në mënyrë që të riorganizohej partia.

“S’po shoh gatishmëri që të bëhet një tërmet i brendshëm në kuptimin e nxjerrjes së faktorëve të rimëkëmbjes së LDK-së. Unë nuk dyshoj se në LDK nuk ka të tillë, por pengesat janë të tilla në kuptimin e hierarkisë së përgjegjësisë, e cila po shihet se nuk po do me reflektu në kuptimin e mirëfilltë të marrjen së përgjegjësisë”, ka thënë Beqaj.

Ai tha se për një “dështim serioz duhet edhe një përgjegjësi serioze”.

“Dikur LDK-ja krekosej se ka 700 mijë anëtarë, sot ka rënë në 100 mijë”, ka shtuar ai.

Politologu Bekim Baliqi ka thënë se humbësja më e madh e zgjedhjeve është Lidhja Demokratike e Kosovës.

Ai ka thënë ajo ka humbur jo vetëm për shkak të përgjysmimit të votave i cili shihet si humbje e thellë dhe afatgjate, por sepse ajo humbi edhe kauzën për të cilën ka ekzistuar deri tash.

“Rrëzimi i Qeverisë Kurti në kohë pandemie ishte kulminacioni i saj. Vetëm 52 ditë pa e dëshmuar vetën, u rrëzua Qeveria dhe kjo është parë si pabesi. Ka pasur zhvendosje të votuesve, e që përmes Vjosa Osmanit e kanë pasur më lehtë të kthehen te Lëvizja Vetëvendosje”, ka thënë ai.

Ai ka thënë se sikur Osmani me listën e saj të shkonte vetë në zgjedhje, do të kishte të vështirë të merrte vota.

Politologu Bekim Baliqi vlerëson se në fushatën për zgjedhjet e mbajtura më 14 shkurt nuk ka pasur shpalosje të programeve nga partitë.

“Programet nuk kanë pasur rol qenësor kësaj here”, ka vlerësuar Baliqi në emisionin Desku në KTV.

Ai votimin, që e ka nxjerr VV-në fituese me gati gjysmën e votave, e ka quajtur “votë ndëshkimi”.

“Kemi qenë dëshmitarë se programet nuk janë shpalosur fare, nuk ka pasur as interesim nga mediat për programet dhe ofertat, sepse ishte një votim ndëshkimi. Gjitha ato probleme të akumuluara me vite, e të cilat në një mënyrë gjatë pandemisë u përshpejtuan, bën që të ishte një lloj referendumi. Gjetja e VV-së për fjalën referendum në aspektin e marrëdhënies diplomatike ishte gjeniale”, ka thënë Baliqi.

Ai ka folur edhe për atë që e ka quajtur konflikt të gjeneratave dhe për votën masive të grave.

“Është edhe konflikt i gjeneratave, shohim grupe që kanë votuar për ndryshim. Shohim votat e diasporës, është trefishuar pjesëmarrja, kemi edhe gratë që në mënyrë masive kanë votuar sivjet dhe këtu Vjosa Osmani ka meritë. Edhe të rinjtë kanë votuar për ndryshim.

© KOHA. Të gjitha të drejtat janë të rezervuara.