Haradinaj e Rama ende s’i kanë raportet e mira mes vete

Kryetari i Aleancës për Ardhmërinë e Kosovës, Ramush Haradinaj ka komentuar raportin e tij me kryeministrin e Shqipërisë Edi Ramën, pasi ky i fundit e kishte paditur më herët Haradinajn për një deklaratë, por që më vonë, e kisha hequr padinë.

“Mua s’më ka ardhur mirë që e kemi pasur një marrëdhënie kështu të prishur mes nesh për shkak se kam jashtëzakonisht shumë respekt për të gjithë bashkëkombësit e mi shqiptarë kudo që janë. Vërtet kemi kaluar në situata të vështira me kryeministrin Rama dhe ende nuk kemi arritur për ta rikthyer komunikimin, unë kam qenë i detyruar të mbaj qëndrime të drejta në mbrojtje të interesit nacional mbarë shqiptar por dhe në mbrojtje të interesit të Kosovës sepse Kosova është Shqipëri. Dëshira ime nuk është që unë të kem rol në zhvillimet e brendshme në Shqipëri, se nuk është detyra ime por e vërteta është që ne kemi hasur në vështirësi të madhe për shkak të qëndrimeve dhe interesave që ka pasur Kosova me kryeministrin Rama”, tha ai për OraNews.

Kryeministri i Shqipërisë, Edi Rama e kishte bërë padinë ndaj Haradinajt, sa ishte kryeministër në detyrë, për siç kishte thënë ai “shpifje”, se Ramush Haradinaj, ka thënë se Edi Rama, Hashim Thaçi dhe Aleksandar Vuçiq do të merrnin 10 miliardë euro për ndarjen e Kosovës.

Ndërkaq, gjatë një vizite në Kosovë kryeministri shqiptar, Rama, në një konferencë për media pati njoftuar se do ta heqë padinë ndaj Haradinajt.

Kryetari i Aleancës për Ardhmërinë e Kosovës, Ramush Haradinaj, ka thënë se Kosova duhet të bëjë një pauzë për një riorganizim total për krijimin e një plani për ecjen përpara me dialogun.

“Ne duhet të bëjmë një llogari tonën, cila është strategjia jonë, dhe si mund të arrijmë suksesin për Kosovë, në këtë strategji mendoj që një riorganizim i krejt angazhimit të Kosovën në dialog do të nënkuptojë një pauzë të dialogut për disa ditë”, tha Haradinaj në një intervistë për OraNews.

Ish-kryeministri i Kosovës ka thënë se spektri politik në vend duhet të bashkëbisedojë dhe të ketë unitet për shumë çështje, përfshirë pozitë e opozitë.

“Një konsultë duhet të ndodhë me spektrin politik jo vetëm me koalicionin qeverisës por dhe me partitë opozitare. E pastaj krijimin e një plani të qartë për ecjen përpara. Unë jam i interesuar që të ndodhë dialogu Kosovë Serbi, mendoj që është i nevojshëm, jetik. Jam i interesuar të arrijmë marrëveshje për njohje reciproke në kufijtë ekzistues që është obligative ligjore. Mendoj se është e arritshme. Ndoshta në etapën e ardhshme kjo nuk do të finalizohet si e plotë, për shkak se Serbia do të provojë të fitojë kohë deri në momentin e anëtarësimit në Evropë. Serbia ka target BE-në, Kosova pos BE-në ka target NATO-n”, tha Haradinaj.