3 perditesime
19:15

Vidhet Thesari, 2 milionë euro u bartën nga MI-ja te një biznes

Që nga 9 tetori, 4 herë, Labinot Gruda, zyrtar i Thesarit të Kosovës, dyshohet se ka transferuar mjete në total prej 2.1 milionë eurosh prej Ministrisë së Infrastrukturës në llogari të një operatori ekonomik.

Një pjesë e mjeteve që u bartën nga buxheti i shtetit, tashmë janë tërhequr.

Sipas burimeve të KOHËS, operatori ekonomik është LDA Group. Sipas Agjencisë për Regjistrimin e Bizneseve, veprimtari parësore e ka ndërtimin e objekteve banesore dhe jobanesore, e selia e të cilit është në Drenas.

Në ARBK, biznesi është regjistruar më 21 gusht 2019, drejtor i të cilit është Valon Shala e në të dhënat e biznesit figuron edhe emri i Kadri Shalës.

Të dy këta, sipas burimeve të KOHËS janë në arrati.

Gjatë së mërkurës, ministrja e Financave, Hykmete Bajrami, bëri të ditur se me t’u vënë re mungesa e mjeteve, kanë njoftuar policinë.

Bajrami njoftoi për arrestimin e një zyrtari dhe suspendimin e një tjetri.

Mjetet e buxhetit, pavarësisht skandalit, sipas Bajramit, megjithatë, janë të sigurta.

Gjatë ditës, policia ka njoftuar se janë kryer bastisje në shtëpitë e të dyshuarve.

“Më 20.10.2020 23:35 pas hetimeve të zhvilluara është arritur të arrestohet një i dyshuar m/k dhe dy të tjerë gjenden në arrati. Të dyshuarit dyshohet se duke keqpërdorur detyrën zyrtare, duke përdorur thesarin shtetëror të Republikës së Kosovës kanë transferuar para në vlerë 2.077.995.90 milionë euro. Janë bërë bastisje të shtëpive të dyshuarve, nuk është gjetur asgjë vetëm është konfiskuar një veturë pronë e njërit nga të dyshuarit. Me urdhër të prokurorit i dyshuari është dërguar në mbajtje”.

KOHA ka provuar të marrë qëndrimin e Ministrisë së Infrastrukturës, prej ku u morën mjetet, mirëpo ministri Arban Abrashi nuk ka kthyer përgjigje.

Zyrtari i Thesarit kishte 11 vjet që punonte në këtë departament.

17:13

Pronarët e operatorit që dyshohet se i mori 2 mln euro nga Thesari, në arrati

Personi i arrestuar në lidhje me zhdukjen e dy milionë eurove nga Thesari i shtetit, është Labinot Gruda, zyrtar që në këtë institucion punon tash e 11 vjet, kanë bërë të ditur burime të KOHËS.

Ndërkohë burimet tregojnë se operatori ekonomik që ka përfituar nga ky transferim i paligjshëm i mjeteve është LDA Group SH.P.K. ,e seli në Llapushnik, pronarët e të cilit, K.SH. e V. SH. janë në arrati.

Gjatë ditës për këtë çështje, mbajti konferencë ministrja e Financave, Hykmete Bajrami. Ajo tha se pavarësisht këtij skandali, buxheti i shtetit është i sigurt.

16:07

Bajrami për zhdukjen e 2 mln eurove: Paratë u tërhoqën nga MI-ja, u transferuan te një operator ekonomik

Ministrja e Financave, Hykmete Bajrami, ka thënë se lidhur me rastin janë suspenduar dy zyrtarë dhe një është arrestuar. Ajo ka thënë se përfitues është një operator ekonomik, për të cilin ka thënë se nuk mund ta zbulojë për shkak të mosdëmtimit të hetimeve.

“Paret janë tërhequr prej Ministrisë së Infrastrukturës dhe kanë kaluar te një operator ekonomik me 9 tetor”, ka thënë ajo.

Ajo ka shtuar se zyrtari i arrestuar ka punuar mbi 11 vjet në Thesar.

Bajrami ka thënë se buxheti është i sigurt dhe janë duke u hetuar të gjitha transaksionet.

"Sot fatkeqësisht lajmi nuk është aq i mirë. Bëhet fjalë për 4 transaksione të dyshimta që kanë ndodhur nga llogaria e Thesarit. Rreth 2.1 milionë euro kanë shkuar në llogari të një operatori ekonomik. E kemi denoncuar rastin. Kemi kërkuar auditim të brendshëm. Janë suspenduar dy persona, një është arrestuar nga Policia e Kosovës. Ne tani kemi gjurmuar të gjitha transaksionet. Institucionet e rendit po bëjnë përpjekje maksimale që këto mjete t’i kthehen Thesarit të Kosovës. Është një rast i izoluar", tha ajo

15:42

“Avullohen” mbi 2 mln euro nga Thesari i shtetit, një i arrestuar

Mbi 2 milionë euro janë marrë ilegalisht nga Thesari shtetëror i Kosovës. Sipas Policisë, lidhur me rastin është arrestuar një i dyshuar, ndërkaq dy të tjerë gjenden në arrati.

Ndërkaq njoftohet se është kërkuar bllokimi i llogarive pasi që dyshohet se një pjesë e parave janë transferuar jashtë vendit.

“Me 20.10.2020 23:35 pas hetimeve të zhvilluara është arritur të arrestohet një i dyshuar m/k dhe dy të tjerë gjenden në arrati. Të dyshuarit dyshohet se duke keqpërdorur detyrën zyrtare duke përdorur thesarin shtetëror të Republikës së Kosovës kanë transferuar para në vlerë 2.077.995.90 milion euro. Janë bërë bastisje të shtëpive të dyshuarve, nuk është gjetur asgjë vetëm është konfiskuar një veturë pronë e njërit nga të dyshuarit. Me urdhër të prokurorit i dyshuari është dërguar në mbajtje”, thuhet në raportin e Policisë.

Këtë e ka konfirmuar për KOHËN edhe zëdhënësi i Policisë, Daut Hoxha, i cili tha se nuk kanë më shumë detaje lidhur me rastin.

Gjithashtu sot është thirrur konferencë për media nga Ministria e Financa e cila do të mbahet nga ora 15:45.