17:54

Kurti i kërkon falje Bajramit

Kryeministri në detyrë, Albin Kurti, i ka kërkuar falje ministres së Arsimit, Hykmete Bajrami, për deklarimin se Qeveria e tij u rrëzua nga mocioni i mosbesimit nga regjimi i kaluar.

Pas deklaratës së Kurtit, kishte reaguar ministrja në detyrë, Hykmete Bajrami, që kishte kërkuar nga Kurti mirëkuptim pasi ajo ka qenë ministre edhe në qeveritë e kaluara.

“Unë mund të them se jam i kënaqur me punën e saj si ministre. Ia kam thënë edhe kur jemi takuar. Por unë kisha harruar që ajo ishte ministre edhe më herët, dhe për këtë i kërkoj falje”, ka thënë Kurti në konferencën për media pas mbledhjes së qeverisë.

Ndaj deklaratës së Kurtit ka reaguar edhe ministri Lumir Abdixhiku.

17:43

Abdixhiku u ndie i ofenduar nga fjalimi i Kurtit që akuzoi “regjimin e vjetër”

Ministri në detyrë i Infrastrukturës dhe Ambientit, Lumir Abdixhiku, është ndjerë i ofenduar nga pjesa më e madhe e fjalimit të kryeministrit në detyrë, Albin Kurti, në mbledhjen e kabinetit që shënoi 100-ditëshin e punës.

Kurti akuzoi edhe LDK-në, duke thënë se “regjimi i vjetër e rrëzoi Qeverinë”.

“Më lejoni të theksoj se ne një pjesë e madhe e kabinetit, pothuajse gjysma këtu, përfaqësojmë një kulturë dhe forcë politike të vendit dhe me krenari përfaqësojmë Lidhjen Demokratike të Kosovës. Andaj çdo lëvdatë ndaj punës sonë është lëvdatë edhe ndaj LDK-së, dhe çdo kritikë ndaj LDK-së është kritikë edhe ndaj neve. Çdo fyerje ndaj LDK-së është fyerje edhe ndaj neve. Unë u ndjeva i ofenduar prej pjesës së fjalimit që ofendon LDK-në”, tha Abdixhiku, përcjell KP-ja.

17:05

Haxhiu: Vettingu prioritet i qeverisë

Ministrja në detyrë e Drejtësisë, Albulena Haxhiu ka deklaruar se procesi i vettingut në institucionet e drejtësisë është prioritet i Qeverisë Kurti. Sipas saj, vetëm me anë të këtij veprimi do të kthehet besimi i qytetarëve në institucione.

Në mbledhjen e qeverisë për 100-ditëshin, Haxhiu ka paraqitur ato që i cilësoi suksese të qeverisë.

“Procesi i vettingut është prioritet i qeverisë sonë me qëllim të kthimit të besimit të qytetarëve në institucionet e drejtësisë. Më lejoni që t’iu informoj se pavarësisht sfidave me pandeminë, grupi i ekspertëve që janë votuar në një mbledhje të qeverisë ka vazhduar punën. Besoj që tash do të kemi një dokument të vlefshëm, por ndoshta do të duhej të ia zgjasim afatin së paku 1 muaj për faktin se rrethanat e pandemisë e kanë kufizuar kontaktin fizik”, ka deklaruar ajo, raporton KP.

Ajo ka thënë se kanë hartuar koncept-dokumentin për Gjykatën Komerciale, si dhe kanë reduktuar shpenzimet e ministrisë.

Për dallim nga Haxhiu, Selim Selimi i AAK-së, i propozuar për ministër të Drejtësisë në “qeverinë Hoti”, kishte paralajmëruar se nëse ai do të bëhet ministër, nuk do të ketë vetting në gjyqësor.

17:03

Reka: Në procesin e liberalizimit gjykatat nuk përmbyllën rastet e korrupsionit të lartë

Ministri në detyrë i Integrimeve Evropiane, Blerim Reka, ka thënë se me të marrë detyrën ka konstatuar se ka ngecje në zbatimin e agjendës evropiane.

Ai në raportin e punës për 100-ditshin e ministrisë që e drejton, tha se sa i përket liberalizimit të vizave Gjykatat e Kosovës nuk kishin përmbyllur rastet e shënjuara të korrupsionit të lartë dhe të krimit të organizuar.

“Tek agjenda evropiane konstatuam ngecje në zbatimin e saj sepse nuk ishte zbatuar gjysma e planit kombëtar për zbatimin e marrëveshjes për Stabilizim Asocimit. Ishte zbatuar më pak se gjysma e agjendës për reformë evropiane ERA 1. Ndërkaq në procesin e liberalizimit të vizave, gjykatat tona nuk kishin përmbyllur rastet e shënjuara të korrupsionit të lartë dhe të krimit të organizuar, që kërkoheshin nga Komisioni Evropian që nga viti 2016”, tha ai.

Kjo vonesë tre vjeçare e mospërmbushjes së reformës evropiane, sipas Rekës, nuk mund të kompensohej me tre muajt e tij në detyrë, përcjell KP-ja.

E për zbatimin e ligjit në këtë ministri, Reka tha se janë gjetur e trashëguar obligime financiare lidhur me kontratën lobuese me një kompani franceze në vlerë prej 168 mijë euro, kontratën lobuese me një kompani amerikane në vlerë 171 mijë dollarë, kontratën për shërbime informimi me një kompani vendore në vlerë 881 mijë e 389 euro dhe kontratën mbi qiranë mujore prej 23 mijë euro.

15:42

Ministrja e LDK-së i reagon Kurtit për deklaratën “regjim i vjetër”

Ministrja e Arsimit nga radhët e LDK-së, Hykmete Bajrami, ka reaguar ndaj deklaratës së kryeministrit në detyrë, Albin Kurti, i cili në mbledhjen e Qeverisë tha se mocioni i mosbesimit ndaj tij u bë nga regjimi i kaluar.

Ajo tha se “për ne si ministra të LDK-së, kjo periudhë pas mocionit ka qenë jashtëzakonisht e vështirë”.

“Në momentin që ka rënë qeveria, ne kemi kërkuar nga partia të na lirojë nga pozitat, por nga kryetari (Isa Mustafa) na është kërkuar qenë kohë pandemie të mos i lirojmë këto pozita. Unë kërkoj mirëkuptimin tuaj, sepse gjatë kësaj kohe jemi munduar që të japim maksimumin dhe konsideroj që nuk mund të konsiderohemi si ministra të suksesshëm në qoftë se sipas jush i takojmë një regjimi të vjetër. Nuk mund të konsiderohemi si ministra të pakorruptuar në qoftë se sipas jush ne i takojmë një familje politike pjesë e së cilës jemi, që qenka në mbrojtje të së keqes dhe korrupsionit. Na lejoni kryeministër që të bëjmë punën dhe të japim maksimumin ashtu siç kemi bërë”, iu përgjigj Bajrami Kurtit.

Ndërsa duke folur për punën e ministrisë që drejton, Bajrami ka thënë se arsimi në Kosovë nuk është në gjendje të mirë. Ajo ka thënë se e kanë gjetur ministrinë jofunksionale si trashëgimi e qeverisë së kaluar.

Bajrami më tutje ka thënë se për 1 muaj kanë arritur të xhirojnë 1 800 njësi mësimore për mësimin në distancë, po ashtu xhirimet janë duke vazhduar në Prizren në gjuhën turke dhe boshnjake.

“Mësimi në distancë ishte mjaft sfidues”, tha ajo.

15:33

Kurti: Në rrëzimin e Qeverisë u bënë bashkë të gjitha partitë e regjimit të vjetër

Pandemia e koronavirusit, presidenti Thaçi dhe opozita janë përmendur si sfidat kryesore nga kryeministri në detyrë i Kosovës, Albin Kurti, në 100-ditëshin e qeverisë së tij.

Në mbledhjen e Qeverisë, teksa u është drejtuar ministrave të kabinetit të tij, Kurti ka bërë një përmbledhje të këtij 100-ditëshi, duke folur për menaxhimin e pandemisë, por edhe shkarkimet e shumta që janë ndërmarrë në më shumë se tre muaj.

Megjithatë, si ka thënë Kurti, krahas pandemisë, gjatë kësaj kohe është përballur edhe me një “president të frustruar që e ka penguar çdo ditë punën e tij”.

“Në këto 100 ditë kemi marrë vendime për kursimin e parasë publike dhe ndaljen e keqpërdorimit të pozitave publike, ku pasurohej një elitë e ngushtë politike që e kontrollonte gjithë shtetin. Nuk mund të luftohen këto për 100 ditë, por kemi bërë hapat e duhur në vendimet e duhura. Por, në këto 100 ditë kishim edhe pengesa: një pandemi globale e një president të frustruar që pengon çdo ditë punën e qeverisë dhe një opozitë që u fokusua në rrëzimin e qeverisë”, tha ai.

Kurti ka thënë se në 3 javët e fundit ka qenë e vështirë që qeveria ta bëjë punën siç duhet në luftimin e pandemisë, sepse duhej prisnin vendimin e Gjykatës Kushtetuese.

“Ne më shumë kohë kemi kaluar duke u marrë me gjëra tjera, sesa shëndetësi. Në tri javët më kritike të pandemisë, Qeveria dhe Ministria e Shëndetësisë e kanë pasur të pamundur të fokusohen në luftimin e pandemisë, sepse duhej të prisnin vendimin e Gjykatës Kushtetuese se si të vazhdonin masat dhe të respektonim gjykatën. Ne kemi reaguar me kohë lidhur me pandeminë dhe masat e hershme dhe bashkëpunim i qytetarëve kanë qenë vendimtare në uljen e numrit të infektimeve”, ka thënë Kurti.

Kurti ka thënë se në rrëzimin e qeverisë janë bërë bashkë të gjitha partitë e regjimit të vjetër.

“Na u bënë bashkë i gjithë regjimi i i vjetër për të rrëzuar një qeveri që është treguar e suksesshme. Pse gjithë kjo urrejtje ndaj një qeverie që ka punuar mirë dhe drejtë dhe pa kursim. Është për keqardhje trajtimi që i është bërë qeverisë nga presidenti. Këta edhe jetën e japin dhe humbjen nuk e pranojnë”, ka thënë ai.

Ai po ashtu ka thënë se në 100 ditët e qeverisë së tij janë ndalur keqpërdorimet dhe se nga zvogëlimi i kabinetit kursehen 1.4 milionë euro në vit.

Kurti ka lavdëruar secilën ministri me radhë dhe i ka falënderuar ata duke iu drejtuar secilit me emër.

Në këtë mbledhje kryeministri në detyrë Albin Kurti, ka kërkuar që ministrat të raportojnë për të arriturat e tyre në jo më shumë se 3 minuta. Në pikë të rendit të ditës është shqyrtimi i raportit të punës dhe ndonjë pikë tjetër mund të shtohet nëse ka kërkesa. Këtë mbledhje Kurti e ka nisur duke kujtuar masakrën e Korishës. Ai ka shprehur ngushëllime edhe për personat që kanë vdekur nga koronavirusi.