Meliza Haradinaj kishte paguar “room service” me para të shtetit

Me paratë e taksapaguesve, “room service” kishte paguar në një hotel Meliza Haradinaj, kur në fund të vitit të 2018-s ishte pjesë e një udhëtimi zyrtar në Vjenë. Vizitën e kishte bërë në cilësinë e këshilltares së Ramush Haradinajt, që atëkohë ishte kryeministër.

Shërbimi në dhomë, çfarë kishte kërkuar Haradinaj, ofrohet kryesisht nga hotele të shtrenjtat dhe kostoja për shërbim të këtillë është ekstra pagesës së dhomës së hotelit. Të tilla shërbime kryesisht kërkohen nga të pasurit. Është shërbim luksi, meqë, mes tjerash, iu mundësohet mysafirëve të përzgjedhin ushqimet dhe pijet, dhe ato t’iu shërbehen në dhomë.