14:02

Osmani e quan të panevojshëm bojkotimin që PDK-ja ia bëri Kryesisë së Kuvendit

Kryetarja e Kuvendit të Kosovës, Vjosa Osmani, ka thënë se bojkotimi i PDK-së ndaj mbledhjes së Kryesisë së Kuvendit, për shkak të zhvendosjes së fotografisë së presidentit Thaçi nga zyra e saj, është i panevojshëm.

“Kryesia e Kuvendit nuk është njoftuar formalisht për një bojkot të tillë, unë e konsideroj si tërësisht të panevojshme. Fotografia e presidentit aktual në asnjë moment nuk është larguar nga ana e kabinetit tim, por vetëm është zhvendosur. Ligji për protokollin e sqaron qartë se fotografia duhet të jetë brenda institucionit. Përderisa është brenda kësaj ndërtesë, vendi nuk është i rëndësishëm”, ka thënë Osmani, raporton KP.

13:05

Kuvendi pret Qeverinë për Projektligjin për buxhetin

Kryesia e Kuvendit në mbledhjen e parë të saj ka vendosur për formimin e komisioneve parlamentare si dhe ka bërë të ditur se është në pritje të qeverisë nëse do të procedojë Projektligjin për buxhetin apo vendimin për zgjatjen buxhetore edhe për muajin mars, thuhet në njoftimin e Kuvendit.

Duke hyrë në rend dite, Kryesia vendosi që numri i komisioneve parlamentare të mbetet 14, ndërsa bëri disa ndryshime në emërtime dhe përgjegjësitë e tyre, si në vijim: Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, Komisioni për Integrim Evropian, Komisioni për Buxhet dhe Financa, Komisioni për të Drejtat dhe Interesat e Komuniteteve dhe Kthim, Komisioni për Punë të Jashtme dhe Diasporë, Komisioni për Arsim, Shkencë, Teknologji, Inovacion, Kulturë, Rini dhe Sport, Komisioni për Qeverisje Lokale, Zhvillim Rajonal dhe Media, Komisioni për Ekonomi, Punësim, Tregti, Industri, Ndërmarrësi dhe Investime Strategjike, Komisioni për Çështjet e Sigurisë dhe Mbrojtjes, Komisioni për Shëndetësi dhe Mirëqenie Sociale, Komisioni për Bujqësi, Pylltari, Zhvillim Rural, Infrastrukturë dhe Mjedis, Komisioni për të Drejtat e Njeriut, Barazi Gjinore, Persona të Pagjetur dhe Peticione, Komisioni për Mbikëqyrjen e Financave Publike dhe Komisioni për Mbikëqyrjen e Agjencisë së Kosovës për Inteligjencë.

Përzgjedhja e komisioneve nga ana e grupeve parlamentare pritet të bëhet në mbledhjen e radhës të Kryesisë.

“Gjatë kësaj mbledhjeje, Kryesia u njoftua edhe lidhur me kërkesën e Thesarit të shtetit përkitazi me buxhetin. Kryetarja Osmani bëri të ditur se Kuvendi është në pritje të vendimit të qeverisë nëse do të procedojë Projektligjin për buxhetin apo vendimin për zgjatjen buxhetore edhe për muajin mars”, thuhet tutje në njoftim.

Po ashtu u dakordua që Kuvendi të ndërtojë agjendë të rregullt pune, duke e përcaktuar të hënën si ditë për mbledhje, e të enjten të mbahen mbledhjet plenare të Kuvendit.

Ndër të tjera, Kryesia diskutoi edhe për funksionalizimin e bordeve të disa institucioneve të pavarura, për hapësirat e punës për deputetë, për lehtësimin e qasjes në hapësirat e Kuvendit të personave me nevoja të veçanta, si dhe çështje të tjera nga fushëveprimtaria e saj, bën të ditur komunikata e Kuvendit.

11:57

Osmani njofton se do të ketë 14 komisione parlamentare

Ka përfunduar mbledhja e Kryesisë së Kuvendit të Kosovës.

Kryetarja e Kuvendit, Vjosa Osmani ka thënë se bazuar në fuzionimin e ministrive do të ketë edhe fuzionim të komisioneve dhe do të jenë vetëm 14 komisione parlamentare, raporton Koha Ditore.

Megjithatë për ndarjen e tyre ka thënë se do të presin deri të hënën pasi që Kuvendi do të ketë edhe disa deputetë të rinj.

Për bojkotin e Partisë Demokratike ka thënë se është e panevojshme pasi që fotografia nuk është larguar është brenda zyrës së njëjtë dhe vetëm ana ka ndryshuar. Ka bërë thirrje që të marrin pjesë në mbledhje dhe të japin kontributin e tyre.

"Ne si opozitë e kaluar kemi pasur arsye për bojkot pasi që është cenuar integriteti territorial. Tani nuk do të ketë cenim të integritetit dhe sovranitetit të vendit", ka thënë Osmani.

11:22

Mblidhet Kryesia e Kuvendit, PDK-ja thotë se e bojkotoi për shkak të Osmanit

Ka filluar mbledhja e Kryesisë së Kuvendit ku pritet të diskutohen propozimet për formimin e komisioneve parlamentare.

Kjo është mbledhja e parë që po drejtohet nga kryepaelamentarja, Vjosa Osmani, derisa këtë mbledhje e bojkotoi Partia Demokratike e Kosovës.

Bedri Hamza i PDK-së, tha se Partia Demokratike e Kosovës ka marrë vendim të bojkotojë mbledhjen e Kryesisë Kuvendit, si reagim ndaj veprimeve të kundërligjshme të Keryeparlamentares Vjosa Osmani me rastin e heqjes së fotografisë zyrtare të presidentit të Kosovës Hashim Thaçi.

Shefi i Grupit Parlamentar të PDK-së, Bedri Hamza, tha në konferencë për media në Kuvend se "koalicioni Vetëvendosje-LDK-Lista Srpska e ka filluuar keq punën dhe sjelljen institucionale".

“Unë e kuptoj se njerëzit kanë nevojë të inspirohen, por për gjëra të tilla janë ambientet dhe hapësirat private. Në institucionet zyrtare janë të rregulluara me ligj. Fotografia e presidentit Rugova është në hapësirat e Kuvendit dhe gjatë udhëheqjes së Kuvendit nga kryetari i PDK-së, Kadri Veseli, është trajtuar me kujdes. Në situatën në të cilën ndodhemi tani, proceset të cilat janë përpara, vlerësojmë se duhet të ketë kohezion të brendshëm. Ne besojmë që opozita e ka vendin në Kuvend. Është mirë për vendin por është mirë edhe për pushtetin. Ndërsa veprimet e zonjës Osmani, opozitës ia pamundësojnë këtë dhe e largojnë nga institucioni. Pra, si rezultat i këtij veprimi të kundërligjshëm, ne si partia më e madhe opozitare, nuk do të marrim pjesë në mbledhjen e Kryesisë së Kuvendit”, tha Hamza.

“Kërkojmë që fotografia zyrtare e Presientit të vendit z. Hashim Thaçi, të trajtohet sipas legjislacionit në fuqi, të kthehet në vendin e vet dhe zonja Osmani të ndalojë veprimet që nuk janë në përputhje me ligjin dhe të cilat e pamundësojnë opozitën të jetë në Institucione dhe të kontriubojë në rolin e saj që e ka të drejtë dhe obligim”, tha Hamza.

Kuvendi i Kosovës ka katër komisione të përhershme siç janë ai për Buxhet e Financa, ai për të Drejtat, Interesat e Komuniteteve dhe për Kthim, Komisioni për Legjislacion dhe Gjyqësi si dhe Komisioni për Integrime Evropiane.

Ndërsa deri më tani kanë qenë 12 komisione të tjera funksionale.

Image