Qendra Klinike Universitare e Kosovës përmes një postimi në Facebook thotë se dy kardiokirurgët që kanë lëshuar shërbyer në Klinikën e Kardiokirurgjisë, e kanë lëshuar punën me vetë dëshirë.
Sipas njoftimit, ata kanë dalë na puna pasi kanë siguruar punë në njërin nga institucionet private shëndetësore.
“SHSKUK mohon pretendimet e tyre se janë penguar në punë, pasi që Klinika e Kardiokirurgjisë, ka ofruar kushte dhe mundësi të njëjta pune për të gjithë kardiokirurgët, dëshmia më e mirë për këtë është numri i procedurave të kryer në këtë shërbim”, thuhet në njoftim.
QKUK thotë se me qëllim të rritjes së stafit të kësaj klinike, vitin e kaluar ka shtuar numrin e kardiokirugëve, e që ka ndikuar dukshëm në ngritjen e volumit të punës në këtë shërbim.
“Po ashtu, në procedurë e sipër është konkursi për pranimin e dy specialistëve të ri të kardiokirurgjisë. QKUK falënderon dy kardiokirugët për kontributin e dhënë për pacientët dhe ju dëshiron punë të mbarë profesionale në angazhimet e tyre të reja”, thuhet në njoftim.
E ndryshe thotë njëri kardiokirurg i dorëhequr.
Arbër Kutllovci thotë se dorëheqja tij erdhi për shkak të ambientit përçarës dhe morbid që ishte krijuar brenda Klinikës së Kardiokirurgjisë, nga ana e shefit të saj, Adem Grbolar.
“Jam menduar gjatë se nëse duhet të qëndroj brenda kësaj Klinike për të cilën kam punuar çdo ditë dhe pa kursyer veten, apo të jap dorëheqje. Mungesa e vendim-marrjes për rastet kardiokirurgjike dhe centralizimi i kësaj vendim-marrje vetëm tek shefi, -mungesa e listave operatore dhe manipulimi me to (superselektim i rasteve nga ana e shefit, njoftim për operacion disa orë para operimit,etj), distribuimi jo-proporcional i rasteve si nga numri ashtu edhe nga patologjia (rastet më të lehta për shefin e më të vështira për Arbërin, etj)”, ka shkruar ai.
Kutllovci thotë se udhëheqja e Klinikës dhe presionet ndaj stafit përfshirë edhe vetë atë, kanë bërë që për një muaj, ai nuk ka pasur asnjë rast operimi, ndonëse thotë se kishte përformancen më të lartë profesionale.
Ai thotë se momarrja e përgjegjësisë profesionale nga ana e shefit, ka bërë që ai të vendosë për t’u larguar nga klinika.
“Mosmarrja e përgjegjësisë profesionale nga ana e shefit (asnjë gatishmëri dhe asnjë kujdestari nuk e mban, ndërsa si duket është paguar për to), njoftimi im që i kam bërë udhëheqjes së kësaj Klinike dhe mos marrja e asnjë mase, më ka bërë që të vendos të largohem nga Klinika e Kardiokirurgjisë. Gjatë kësaj kohe kam punuar kështu: -Rastet më të vështira, herë-herë nga 5-6 javë nuk kam operuar. Ato raste që kam operuar jam njoftuar në ora 18:00 apo 22:00 se të nesërmen do ta operoj X-pacientin, ku shpesh kanë qenë të pa-përgatitura si duhet për operim. Rastet që i kam operuar dhe nuk kanë guxuar t’i operojnë (duke përshirë edhe shefin) dhe kanë qëndruar me muaj në Klinikë, kanë kërkuar raport nga unë "pse ka shpëtuar pacienti pas operimit", shkruan ai.
Ai thotë se ka tendenca të minimizimit të kësaj situate, por se e vërteta qëndron siç ka shkruar ai.
“Unë jam Kirurg dhe vendi i punës time është salla e operacionit. Nëse unë nuk operoj në një Klinikë duhet të gjej vendin se ku duhet të operoj, ku duhet të ofroj shërbimet e mija. Jam i vetëdijshëm që ka tendenca të minimizimit të kësaj pune, por e vërteta është kjo! Normal që unë do të angazhohem në ndonjë institucion për të kryer punën e Kardiokirurgut, sepse unë nuk "tredhi miza", por operoj zemrën! P.S. Ky është reagimi im i fundit lidhur me këtë situatë”, thuhet në njoftim.
