Arbëri

Haradinaj: Miratimi i rezolutës për vëllezërit Bytyçi mesazh për Serbinë, rruga e vetme është pranimi i fajësisë

Haradinaj: Miratimi i rezolutës për vëllezërit Bytyçi mesazh për Serbinë, rruga e vetme është pranimi i fajësisë
Foto: Koha

Kryeministri i dorëhequr i Kosovës, Ramush Haradinaj, thotë se miratimi në mënyrë unanime i rezolutës për vëllezërit Bytyçi, nga Kongresi Amerikan, është një lajm i mirë, jo vetëm për familjen e tyre por edhe për dëshmimin e krimeve të pushtetit serb, të kryera në Kosovë.

Dhoma e Përfaqësuesve, miratoi të martën një rezolutë, me të cilën i kërkohet Serbisë që të vërë para drejtësisë vrasësit e tre vëllezërve Bytyçi, shtetas amerikanë, në vitin 1999, ndërsa bën thirrje që përparimi në ndriçimin e këtij rasti të jetë “faktor i rëndësishëm që përcakton zhvillimin e mëtejshëm të marrëdhënieve ndërmjet Shteteve të Bashkuara dhe Serbisë”.