21:45

Nga 23 të arrestuarit për patentë shoferë, 16 janë zyrtarë të Ministrisë së Infrastrukturës

Policia e Kosovës ka arrestuar 23 persona të dyshuar për disa vepra penale.

Sipas njoftimit të Policisë, Drejtoria për Hetimin e Krimeve Ekonomike dhe Korrupsionit, konkretisht Njësia Rajonale për Hetimin e Krimeve Ekonomike dhe Korrupsionit në Prishtinë, ka pranuar një informatë nën dyshimin e kryerjes së veprave penale “keqpërdorim i pozitës apo autoritetit zyrtar” dhe “marrja e ryshfetit”, nga pronari i një auto-shkolle me seli në Fushë Kosovë dhe disa zyrtarëve të Ministrisë së Infrastrukturës.

Pas pranimit dhe analizimit të informatës së lartcekur, hetuesit e NJRHKEK-Prishtinë nën autorizimet e prokurorit të Prokurorisë Themelore, Departamenti për Krime të Rënda, kanë filluar aktivitete konkrete hetimore, duke përfshirë të gjitha veprimet e avancuara hetimore. Policia, gjatë kësaj periudhe kohore ka siguruar prova-dëshmi relevante që lidhen me veprat penale.

“Sot, më 05.07.2019, është realizuar operacioni policor i fokusuar në këto lokacione: Ministria e Infrastrukturës-Departamenti për Patentë Shofer, një auto-shkollë në Fushë Kosovë dhe një ordinancë në Fushë Kosovë”, thuhet në njoftim.

Sipas njoftimit, dyshohet se të dyshuarit u kanë mundësuar personave të interesuar që të pajisen me patentë shofer të kategorive të ndryshme pa kaluar nëpër testet e nevojshme, në kundërvlerë të parave varësisht prej kategorisë së patentë shoferit (400 – 1000 €).

Të dyshuarit e arrestuar sot gjatë operacionit policor janë: F.K. viti i lindjes 1968 f.k.sh. N.L. viti i lindjes 1966 m.k.sh. F.L. viti i lindjes 1993 m.k.sh. L.A. viti i lindjes 1988 m.k.sh. E.B. viti i lindjes 1994 m.k.sh. L.Sh. viti i lindjes 1977 m.k.sh. F. A. viti i lindjes 1983 f.k.sh. F.F. viti i lindjes 1989 f.k.sh. A.M. viti i lindjes 1970 m.k.sh. A.R. viti i lindjes 1957 m.k.sh. N.B. viti i lindjes 1962 m.k.sh. F.E. viti i lindjes 1962 m.k.sh. M.M. viti i lindjes 1973 f.k.sh. A.B. viti i lindjes 1967 m.k.sh. Sh.Z. viti i lindjes 1959 m.k.sh. D.Zh. viti i lindjes 1960 m.k.s. B.J. viti i lindjes 1984 m.k.sh. A.K. viti i lindjes 1956 m.k.sh. L.B. viti i lindjes 1961 f.k.s. H.J. viti i lindjes 1966 m.k.sh. Sh.S. viti i lindjes 1981 m.k.s. A.T. viti i lindjes 1963 m.k.sh. P.T. viti i lindjes 1995 m.k.sh.

Pra,siç njoftohet, janë arrestuar njëzet e tre të dyshuar.

“Gjashtëmbëdhjetë të parët në listë janë zyrtarë të Ministrisë së Infrastrukturës-Departamenti për patentë-shofer, pesë të tjerët në vazhdim të listës janë një menaxher, tre mjekë dhe një psikolog i një ordinance dhe dy të fundit e listës janë bashkëpronar të një në auto-shkolle”, thuhet tutje në njoftim.

Policia gjatë zhvillimit të operacionit policor ka sekuestruar edhe prova relevante që do përdorën si dëshmi në procedura gjyqësore. Me aktvendim të prokurorit, gjithë të dyshuarve u është shqiptuar masa e ndalimit prej 48 orëve.

19:04

Ekzaminerë, staf administrativ, mjekë e kandidatë të arrestuar në aksionin e Policisë për patentë shoferë

Pak para se ta përfundonin orarin e punës, këta persona përfunduan me pranga në duar.

Ata u arrestuan si pjesë e një operacioni të madh të Policisë, për shkelje me patentë shoferë, raporton KTV.

Disa prej të arrestuarve, Policia mezi u gjeti vend për t’i marrë e dërguar në stacionin policor.

Ekzaminerë, staf administrativ, mjekë, kandidatë e edhe persona me pozita të tjera, u arrestuan gjatë aksionit masiv të Policisë së Kosovës.

Në bazë të burimeve të Kohës Ditore, dy prej të arrestuarve janë edhe zyrtarë që kanë pozita të larta në Ministri të Infrastrukturës.

Kohavisioni ka provuar të kontaktojë zyrtarë të Ministrisë së Infrastrukturës për këtë rast, por ata nuk kanë qenë të qasshëm.

E, detaje të tjera nuk kanë dhënë asnjë nga institucionet e drejtësisë.

17:24

Momenti i arrestimit të zyrtarëve të Ministrisë së Infrastrukturës

Policia e Kosovës sot ka zhvilluar një aksion masiv me ç’rast ka arrestuar 20 zyrtarë në pozita të ndryshme për patentë shoferë, përfshirë këtu edhe zyrtarë të Ministrisë së Infrastrukturës.

KTV-ja ka siguruar pamje nga momenti i arrestimit të të dyshuarve në Stacionin e Autobusëve në Prishtinë.

15:38

Aksion masiv i Policisë, së paku 10 të arrestuar

Është duke ndodhur një aksion masiv i Drejtorisë së Krimeve Ekonomike.

Burime të Koha.net bëjnë me dije se aksioni ka lidhje me patentë shoferët. Mësohet se deri tash janë arrestuar së paku 10 zyrtarë të Ministrisë së Infrastrukturës.

Arrestimet po bëhen për korrupsion dhe krim të organizuar, mëson Koha.net.

Bastisjet janë duke vazhduar nëpër shumë lokacione.