Zëvendëskryeministri dhe ministri i Punëve të Jashtme, Behgjet Pacolli, e ka quajtur të papranueshme mohimin e masakrës së Reçakit nga ministri i Jashtëm i Serbisë, Ivica Daçiq.
Në një postim në Facebook, ai ka thënë se si ministër i Punëve të Jashtme ka vendosur që të gjithë zyrtarët serbë që përmes deklaratave i mohojnë krimet e luftës të kryera në Kosovë do të shpallen persona non-grata derisa i ka bërë thirrje Prokurorisë të marrë masa ligjore kundër tyre.
“Zëdhënësi i Millosheviçit vazhdimisht ofendon viktimat, familjaret e tyre dhe mohon vrasjet masive dhe gjenocidin në Kosovë nga regjimi që ai i shërbente i përkushtuar. Serbia kreu krimet më të këqija kundër civilëve shqiptarë, boshnjakë dhe kroatë në Evropë që nga nazistët gjatë Luftës së Dytë Botërore kundër hebrenjve”, ka shkruar ai.
Sipas tij, arsyeja pse Daçiq dhe fashistë të tjerë në Serbi mohojnë krimet e luftës është sepse drejtësia ndërkombëtare dështoi në sjelljen e atyre para drejtësisë që kryen krime kundër njerëzimit në Kosovë.
Pacolli thotë se, drejtësia për viktimat e luftës në Kosovë nuk do të arrihet kurrë nëse drejtësia ndërkombëtare vazhdon ta fsheh gjithë ato krime nën qilim.
“Nëse nuk ka dënim për krimet e Beogradit të kryera në Kosovë nuk do të ketë kurrë pajtim dhe këta fashistë në Beograd do të vazhdojnë të mohojnë krimet që kanë kryer. Si Ministër i Punëve të Jashtme kam vendosur që të gjithë zyrtarët serbë që bëjnë deklarata që i mohojnë krimet e luftës të kryera në Kosovë të shpallen persona non-grata në Kosovë dhe i bëjnë thirrje Prokurorisë të marrë masa ligjore kundër tyre.”, ka shkruar ai.
© KOHA. Të gjitha të drejtat janë të rezervuara.
