Mbyllet qendra e skijimit në Brezovicë për dy ditë

Dorentina Thaqi Dorentina Thaqi 26 January 2019 15:21
19:03

Ilir Morina, drejtori i Agjencisë për Mbrojtje të Mjedisit në Kosovë, në një prononcim për media para pak çastesh, ka konfirmuar se Qendra e Skijimit në Brezovicë do të mbyllet për dy ditë.

“E gjithë qendra do të mbyllet për dy ditë si pasojë e ngjarjes dhe hetimeve që do të zhvillohet për rastin. Agjencia e Mjedisit ka paralajmëruar mbrëmë se gjendja është shumë e vështirë si pasojë e reshjeve shumë të mëdha dhe s’ka qenë e mundur të pastrohen as rrugët e as pista në Qendër”, ka thënë Morina, raporton Koha.net.

Ai ka shprehur ngushëllimet më të thella për familjen Daci dhe miqtë e tij, duke thënë se tashmë kanë filluar të hyjnë në menaxhim të ngadalshëm në Brezovicë, por theksoi se “e kemi kuptuar se duhet të shpejtojmë”.

“Kanë qenë dy orteqe, e njëri nga ta i ka zënë dy persona. Si pasojë, fatkeqësisht zotëri Daci ka mbetur pa shenja jete”, tha më tej ai.

Para pak çastesh, trupi i viktimës Arian Daci, është bartur me moto-ski nga ambulanta ku qëndroi deri më tani, në Institutin e Mjekësisë Ligjore për t’iu nënshtruar obduksionit.

17:08

Detaje nga incidenti tragjik në Brezovicë

Rreth orës 14:00 të ditës sotme ka ndodhur një ngjarje e rëndë në qendrën e skijimit në Brezovicë.

Arian Daci, Zëvendësministër i Diasporës, njëherësh i biri i kryetarit të Akademisë së Shkencave të Kosovës, Nexhat Daci, derisa ishte duke skijuar bashkë me një grup skiatorësh, ka mbetur i vdekur si pasojë e një orteku të rënë në vendin e quajtur “Foleja e Shqiponjës”, raporton Koha.net.

Bashkë me të ndjerin Daci, ka qenë edhe Ardian Bakalli, i cili po ashtu ka mbetur i ngujuar nga orteku, por që për fat të mirë, ka shpëtuar. Ai është në gjendje të mirë shëndetësore.

Lajmin për vdekjen e Dacit e ka konfirmuar për KTV-në Ilir Morina, drejtori i Agjencisë për Mbrojtje të Mjedisit në Kosovë.

Nënkolonel Basri Shabani, nga Policia në Rajonin e Ferizajt, ka thënë se të gjitha ekipet janë lajmëruar dhe janë duke ardhur tashmë në vend të ngjarjes.

Ekipi i KTV-së që po qëndron në Brezovicë, raporton se trupi i viktimës ka arritur në qendër të skijimit dhe aktualisht po mbahet në bodrumin e një prej hoteleve, ku është marrë nga mantelbardhët. Para këtij objekti po qëndrojnë forca të Policisë së Kosovës të cilët nuk po lejojnë të hyjë askush i paautorizuar në vendin ku po qëndron trupi i pajetë i Dacit.

Mësohet po ashtu se me të ndjerin Daci, gjatë kohës kur ka rënë orteku, ka qenë edhe një grup tjetër skiatorësh, por që të njëjtit kanë shpëtuar pasi kanë qenë të pajisur me pajisje mbrojtëse.

Nga Brezovica, KTV-së i kanë thënë se i ndjeri dhe grupi tjetër i skiatorëve kanë skijuar në vende ku zakonisht nuk skijohet, që janë pjesë shumë të pjerrëta.

Mësohet po ashtu se Daci ka qenë pa shenja jete në kohën kur është nxjerrë nga thellësia e borës.

Kujtojmë se në vendin e njëjtë, rreth 2 vite më parë, ka vdekur edhe një person nga Ferizaj.

15:27

Një i vdekur nga orteku në Brezovicë

Ilir Morina, drejtori i Agjencisë për Mbrojtje të Mjedisit në Kosovë, ka thënë se nga orteku që ndodhi në Brezovicë, një person ka vdekur.

Grupi Koha do t'ju mbajë të informuar. 

15:21

Ortek bore në Brezovicë, dyshohet se ka zënë dy persona

Para pak minutash ka rënë një ortek bore në Brezovicë.

Nënkolonel Basri Shabani nga policia në rajonin e Ferizajt, e ka konfirmuar lajmin për KTV, dhe ka thënë se dyshohet që ky ortek ka zënë dy persona.

Deri tani, nuk raportohet për të lënduar. 

Image
Image
Image
Image

Image

Image

© KOHA. Të gjitha të drejtat janë të rezervuara.

Komentet

Shto koment

Të ngjashme