Anulohet vendimi, në përfaqësi diplomatike s’lejohet votimi me dokumente të skaduara

Paneli Zgjedhor për Ankesa dhe Parashtresa ka anuluar vendimin e Komisionit Qendror të Zgjedhjeve që ua mundësonte mërgatës që të votojë në përfaqësi diplomatike edhe me dokumente me afat të skaduar.

Ankesa u parashtrua nga Instituti Demokratik i Kosovës (KDI). Sipas ankesës, KQZ-ja me vendim ka ndryshuar përmbajtjen e ligjit. E këtë e ka vlerësuar edhe PZAP-ja që ka thënë se KQZ-ja nuk ka pasur autorizim që ta bëjë këtë.

“Paneli vlerëson se kjo dispozitë është e qartë dhe nuk lejon dualizem në interpretim që do ta barazonte dokumentin e vlefshëm me dokumentin me afat të skaduar. Në këtë rast ligji nuk ka përdorur vetëm termin "dokument identifikimi", por shprehimisht ka kërkuar “dokumente të vlefshme të identifikimit". Prandaj, vlefshmëria e dokumentit nuk është vetëm element formal i parëndësishëm, por një kusht ligjor për identifikimin e votuesit në ditën e votimit dhe dhënies se mundësisë për te votuar”, thuhet në vendimin e PZAP-së të publikuar të premten.

Diaspora ka pasur dy mundësi votimi nga jashtë – me postë dhe në përfaqësi diplomatike, proces që mbahet të shtunën (6 qershor). Mundësia e tretë është votimi direkt në Kosovë.