Zgjedhjet 2019

S’dihet kur numërohen votat me postë dhe kategoritë e tjera të veçanta

Qendra për Numërim dhe Rezultate, gjatë së hënës, ka vazhduar me pranimin e materialit të ndjeshëm nga të gjitha vendvotimet në Kosovë.

Sipas zëdhënësit të KQZ-së, Valmir Elezit, gjithçka është duke shkuar në rregull, raporton KTV.

E në tërë Kosovën, të regjistruar për të votuar kanë qenë rreth 2 mijë e 700 persona me nevoja të veçanta, që brenda ditëve në vazhdim pritet të dihet edhe numri i saktë i atyre që kanë shfrytëzuar të drejtën e votës.

Elezi ka treguar se ende nuk ka filluar edhe numërimi i votave me kusht dhe i atyre të diasporës.

Derisa KQZ-ja ka bërë numërimin e më shumë se 98 % të votave, janë regjistruar mbi 40 mijë fletëvotime të pavlefshme, e që sipas KQZ-së ky numër mund të rritet.

E, edhe më tutje sipas rezultateve të KQZ-së, renditja e partive politike sipas votave nuk ka ndonjë ndryshim të madh, krahasuar me publikimet gjatë mbrëmjes të së dielës.

Pra, Lëvizja Vetëvendosje aktualisht po prin me numrin më të madh të votave, duke vazhduar me LDK-në, e pastaj me PDK-në.

E koalicioni AAK-PSD vazhdon të mbetet në vendin e katërt, duke lënë mbrapa Listën Serbe dhe koalicionin NISMA-AKR-PD, e cila ende nuk e ka kaluar pragun zgjedhor.