Përfaqësuesit politikë përplasen rreth mundësisë së Kosovës për të blerë armatim

12 September 2019 20:12
21:16

Përfaqësuesit politik janë përplasur rreth mundësisë së Kosovës për të blerë armatim.

Ka qenë Arben Gashi nga LDK-ja, i cili e ka mohuar një mundësi të tillë, duke thënë se Kosova nuk mund të blejë armatim pa pasur marrëveshje paraprake me NATO-n.

Ai thotë se pa këtë marrëveshje askush nuk i shet armë Kosovës.

“Pse nuk është blerë armatimi, sepse nuk ke marrëveshje. Për këtë punë duhet bashkëpunim me SHBA-në”, ka thënë ai.

Gashi ka thënë se përderisa ekziston NATO nuk ka rrezik real për Kosovën nga Serbia. Sipas tij, Kosova duhet t’i ketë kapacitetet e veta dhe këto duhet të ndërtohen në mënyrë të padiskutueshme.

Selim Selimi nga koalicioni AAK-PSD thotë se mendësia e Serbisë që të mos hyjë në NATO është rrezik për rajonin.

“Mendësia e tyre për të mos hyrë në NATO është rrezik për ne. Ne nuk mund të matemi se kush është më i fortë sepse është NATO ama rrezik është”, ka thënë ai.

Ai thotë se nuk është e vërtetë që nuk ka qasje në tregje të armëve nëse ke ushtri, sipas tij, duhet vetëm të kesh para.

Ndërkaq Enver Dugolli nga Lëvizja Vetëvendosje ka thënë se politikat e dobëta kanë prodhuar FSK të dobët.

Ai tutje ka thënë se Kosova është e vogël dhe e dobët që t’i prishë balancat e dikujt.

Dugolli thotë se Turqia e shtetet tjera janë çështje komplet tjetër sa i përket blerjes së armëve.

E, Fatmir Xhelili nga PDK-ja ka thënë se Kosova është duke përfituar nga trajnimet me SHBA-të.

Ai thotë se Kosova do të jetë partner korrekt me shtetet e anëtarësuara në NATO.

21:01

VV do shërbim të detyrueshëm ushtarak, kundërshtojnë partitë tjera

Shërbimi i detyrueshëm ushtarak është pika që ka përplasur partitë në Rubikon të KTV-së.

Teksa Vetëvendosje është shprehur se dëshiron një shërbim të tillë, partitë tjera kanë thënë se duhet planifikim më i mirë dhe kjo duhet të vendoset gjatë procesit të zhvillimit.

Enver Dugolli i VV-së ka thënë se në Kosovë s’ka pasur politika të mira për mbrojtjen e vendit dhe se duhet rritur kapacitetet e FSK-së.

“Zotohemi se për mandatin katërvjeçar do ta bëjmë Ushtrinë, me këto ligje. Do të adaptojmë ligjin që të fusim në funksion edhe shërbimin e detyrueshëm ushtarak. Duhet të krijohet sistem i kombinuar profesional dhe i obligueshëm. Gjermania po e kthen, njëjtë edhe Kroacia. E ka edhe Zvicra dhe shtete të NATO-s”, ka thënë ai duke shtuar se programi i tyre për FSK-në parasheh fokus në “edukim, trajnim, zhvillim, infrastrukturë dhe armatim”.

Me këtë rast reagoi Selim Selimi nga koalicioni AAK-PSD duke thënë se me ligjet aktuale “Ushtria e Kosovës është organizatë profesioniste, që kontribuon në rajon bashkë me NATO-n dhe shërbimin e obligueshëm nuk e kemi me ligj”.

“Është shërbim profesional ushtarak, siç janë ushtritë moderne”, ka thënë ai.

Me këtë u pajtua edhe Fatmir Xhelili i PDK-së që ka thënë se konfiguracioni i Kosovës ia mundëson Ushtrisë ta mbrojë lehtë vendin. Ai ka thënë se me ligjet aktuale për Ushtrinë është bërë planifikim i mirë.

“Kosova do të ketë ushtri dinamike, të vogël, të aftë për të mbrojtur territorin e Kosovës. Jemi për ushtri profesionale. Konfiguracioni i Kosovës ia mundëson ta mbrojë lehtë Kosovën”, ka thënë ai.

Arben Gashi i LDK-së ka thënë se ideja e shërbimit të obligueshëm ushtarak është diskutuar edhe në LDK, por ka shtuar se kjo duhet të shihet gjatë procesit të zhvillimit.

“Po flasim për shekullin 21, me luftën që po kryhet në ajër. Deklarimet për opsione të tilla tani janë për të fituar simpati momentale. Është diskutuar edhe në LDK, e ka propozuar deputeti Anton Quni dhe është arrit në konkluzionin se është serioz, por duhet të shihet në proces. Duhet të ngrihen kapacitetet infrastrukturore. Ku i çon 10 mijë vetë? Duhet të jetë pjesë e projektit strategjik të Kosovës”, ka thënë ai duke shtuar se për çfarëdo vendimi për Ushtrinë patjetër duhet pajtim të brendshëm e koordinim me partnerët.

20:34

Gashi: Ushtria nuk është meritë e asnjë individi, por punë 20 vjeçare

Arben Gashi i LDK-së, në Rubikon të KTV-së ka thënë se krijimi i ushtrisë nuk është meritë e asnjë individi, por është punë e dy dekadave të fundit.

Madje ai ka thënë se nuk duhet gënjyer as veten e as opinionin publik, meqë ushtria nuk ka përfunduar ende.

“Këtu ka një tendencë për të glorifikuar rolin individual të disa personave. Ky është një proces që ka ndodhur për 20 vjet, dhe nuk bazohet në kontributin e as në punën e një individi”, ka thënë Gashi.

Ai ka kujtuar se ka qenë edhe Hashim Thaçi, që kishte iniciuar formimin e Ushtrisë, por kishin qenë miqtë ndërkombëtarë ata që kishin kërkuar kohë.

“Pati dal edhe ambasadori amerikan me deklaratë, se ushtria duhet të formohet, por na jepni pak kohë që të ezuarojmë të gjitha mundësitë ligjore, për të bindur palët që kjo të bëhet me ndryshime kushtetuese. Nuk ndodhi ajo, u hap mundësia që të bëhet me ligj”, ka thënë Gashi.

Tutje Gashit ka thënë se Kosova i ka ndryshuar disa ligje, por nuk ka ngritur kapacitetet.

“Mos ta mashtrojmë veten dhe opinionin publik se ne e kemi bërë këtë gjë. Kjo do të bëhet për 10 vitet e ardhshme. Por ne duhet të mendojmë se çfarë ushtrie duam të bëjmë, anëtare të NATO-s, apo çfarë”, ka thënë ai.

Image
20:25

Dugolli thotë se Kosova ka ushtri vetëm në letër

Enver Dugolli nga Vetëvendosje, ka thënë se ushtria e Kosovës është vetëm në letër.

Sipas tij, Vetëvendosje ka potencuar në vazhdimësi se shteti pa ushtri është gjysmë shteti.

“Ne kemi një ushtri e cila është në letër por edhe kështu siç është ne kemi dhënë kontribut maksimal në formimin e saj. Janë dy amendamente kruciale që janë shtyu në këtë ligj, janë sovraniteti i shtetit, dhe limiti që ka qenë deri në 5000 është heq”, ka thënë ai.

Ai në Rubikon të KTV-së thotë se e quan ushtri në letër, pasi që ligji për të nuk po zbatohet dhe si i tillë ka mbetur vetëm i shkruar.

Ai thotë se duhet të dyfishohet buxheti dhe sipas tij FSK-ja duhet të jetë një forcë që garanton sovranitetin, paqen dhe sigurinë.

Ai tutje shton se nëse bëhet ashtu siç është paraparë edhe 10 vjet Kosova do të ketë ushtri në letër.

Dugolli ka thënë se nga asnjë subjekt nuk është marrë shumë seriozisht formimi i ushtrisë.

“VV ka insistuar që çështja e ushtrisë është urgjente, është nevojë, sidomos kur kemi një Serbi që armatoset çdo ditë”, ka thënë ai.

Ai ka thënë se ushtria ndërtohet për të mbrojtur vendin, e sipas tij rreziku kryesor që i kanosët Kosovës është Serbia.

Image
20:20

Xhelili: S’është veç Haradinaj meritor për Ushtrinë

Fatmir Xhelili, ish-deputet i PDK-së, ka thënë se kryeministri në dorëheqje, Ramush Haradinaj, nuk është i vetmi person që është meritor për krijimin e Ushtrisë së Kosovës.

Duke folur për miratimin e ligjeve që mundësonte transformimin e FSK-së në Ushtri, Xhelili në Rubikon të KTV-së ka thënë se ky ka qenë proces i gjatë e racional.

Sipas tij, procesi i tillë ia mundësoi FSK-së të ruajë partneritetin strategjik me partnerët.

“PDK-ja si udhëheqëse e qeverisë në dy mandatet e para ka qenë e lidhur ngushtë me modernizimin dhe zhvillimin e Forcës së Sigurisë. Tash po arrihen standardet e NATO-s. Kemi aprovuar ligjet bazike për të qenë ushtri e jona, por kompetencat e plota për kontrollimin e territorit dhe integritetit tokësor të Kosovës i ka NATO-ja. PDK ka mision që FSK-ja të zhvillohet. Nëse flasim për ndikime individuale është edhe ndikimi i Kadri Veselit (kryetarit të PDK-së), që me një rrugëtim drejt SHBA-së ka qenë shumë orientues për të marrë konfirmim të partnerit strategjik”, ka thënë ai.

Image
20:12

Selimi: FSK-ja ushtri e mençur që do t’i japë vlerë NATO-s

Selim Selimi nga koalicioni AAK-PSD ka thënë se gjatë këtij mandati të qeverisë, Kosovës i është dhënë mandati mbrojtës.

Ai në Rubikon të KTV-së ka thënë se për votimin e ligjeve të ushtrisë në Kuvend ka pasur përkrahje të fortë ndërkaq bekimi për formimin e ushtrisë është marrë nga Shtetet e Bashkuara të Amerikës.

“E dimë që edhe më herët ka pasur tendenca që kjo të shtyhet përpara por nuk është bërë për shkak të politikave të ndryshme”, ka thënë ai.

Selimi ka thënë se integrimi në NATO është proces në vete por do të bëhet me mbështetje të vendeve ndërkombëtare të cilat e përkrahin Kosovën.

Ai tutje ka shtuar se FSK-ja është ushtri e re dhe e mençur ndërkaq hyrja e Kosovës do të jetë një vlerë e shtuar e NATO-s.

Image

 

© KOHA. Të gjitha të drejtat janë të rezervuara.

Komentet

Shto koment

Të ngjashme