Qeveria indiane propozon ndalimin e kriptovalutave

Qeveria indiane ka kërkuar të propozojë një ligj që i ndalon të gjitha kriptovalutat, ku çdokush që përfshihet në tregtimin e tyre, mund të gjobitet.

Një zyrtar i lart qeveritar kishte deklaruar se ligji synon të penalizojë zotërimin, lëshimin, tregtimin dhe transferimin e kriptovalutave.

Një nga arsyet për ndalimin e tyre thuhet se është mungesa e rregullimit. Ekspertët kanë thënë se monedhat e tilla janë të paqëndrueshme sa i përket vlerës së tyre dhe mund të rezultojnë në katastrofë financiare për investitorët.

Deri më tani s’ka të dhëna zyrtare në Indi për numrin e investitorëve të kriptomonedhës dhe vlerën e investimeve të tyre. Raportet jozyrtare thonë se janë mbi tetë milionë investitorë dhe qindra milionë paund investime.

Nëse projektligji shndërrohet në ligj, kjo do t’u sjellë një goditje investitorëve.