Google dëshiron të sigurohet që nëse Androidi fillon të zbehet ndonjëherë dhe për ndonjë arsye nuk pranohet, në rezervë ta ketë një tjetër sistem operativ. Prandaj, kompania e ka formuar një ekip prej mbi 100 personash që po punojnë në sistemin operativ Fuchsia, në një platformë tjetër me kod (burim) të hapur. Tani Google e ka prezantuar edhe sajtin për developerë për këtë OS: Fuchsia.dev, raporton PhoneArena.
Fuchsia nuk e përdor kernelin Linux ashtu si sistemet operative Android dhe Chrome. Në vend të kësaj ai e përdor mikrokernelin Zirkon. Mikrokerneli është sasia më e vogël e softuerëve të nevojshëm për ta ekzekutuar sistemin operativ. Fuchsia sigurisht funksionon ndryshe nga Androidi, por cross-platforma Flutter SDK do t’ua mundësojë developerëve Android që t’i portojnë shpejt aplikimet e tyre në Fuchsia, shkruan KOHA Ditore.
Nëntorin e kaluar Fuchsia OS e shtoi mbështetjen për çipsetin Huawei Kirin 970 dhe sistemi operativ u fut me sukses në Honor Play. Megjithatë, nevojitet edhe shumë punë në sistem, dhe sigurisht që do të duhet një kohë e gjatë që sistemi operativ Fuchsia në një moment ndoshta ta zëvendësojë Android OS, i cili aktualisht është i pranishëm në mbi 85% të telefonave në botë.
Lansimi i sajtit për developerë do ta ndihmojë kompaninë Google që ta promovojë Fuchsia OS, ndërsa developerët do të kenë mundësi të njihen dhe të mësojnë për sistemin e ri operativ.