Prezantohet ora e mençur Lenovo Carme

Javën e kaluar, kompania kineze Lenovo i prezantoi dy telefona të rinj - A6 Note dhe K10 Note. Kompania tani e ka publikuar edhe një orë të re të mençur, të quajtur Lenovo Carme, raporton GSMArena.

Lenovo Carme e ka një ekran 1.3-inçësh me ngjyra, me një dizajn të lakuar 2.5D të sipërfaqes, i cili do t’ua lehtësojë përdoruesve që ta shohin përmbajtjen në ekran në kënde të ndryshme.

Ora e mençur mund të shfaqë në ekran njoftime për mesazhe tekstuale dhe thirrje, dhe vjen edhe me funksione për fitnes, siç janë pedometri, leximi i rrahjeve të zemrës dhe monitorimi i gjumit, shkruan KOHA Ditore. Gjithashtu të pranishme janë opsionet për monitorimin e aktiviteteve të ndryshme sportive.

Lenovo Carme e ka certifikatën IP68, që do të thotë se nuk keni nevojë ta hiqni derisa notoni. Ai lidhet me telefonat Android dhe iPhone përmes Bluetooth 4.2, dhe e ka një bateri prej 200mAh e cila zgjat deri në shtatë ditë.

Ora e mençur do të jetë në dispozicion nga 15 shtatori me rripa gome të kaltër dhe të gjelbër, me një çmim prej rreth 50 dollarë/45 euro.