Një mjet me inteligjencë artificiale mund ta thyejë një fjalëkalim përpara se të lexoni këtë lajm

Nëse nuk keni besuar se fjalëkalimet mund të thyhen me lehtësi, inteligjenca artificiale është këtu për t’ju provuar të kundërtën, shkruan TechoNews.

Një mjet AI arriti të thyente gjysmën e fjalëkalimeve me të cilat u përball nën një minutë dhe 65 për qind brenda një ore.

Eksperimenti u krye nga kompania e sigurisë kibernetike Home Security Heroes duke përdorur PassGAN, një mjet të ri për thyerjen e fjalëkalimeve.

Ndryshe nga mjetet e zakonshme të thyerjes së fjalëkalimeve të cilët përdorin një set të caktuar të dhënash, PassGAN udhëhiqet nga dy rrjete neurale: një për të gjeneruar fjalëkalime dhe tjetri për të dalluar fjalëkalimin e parë të rremë me fjalëkalimet e marra nga thyerjet e vërteta të sigurisë.

Si rezultat, ky mjet mund të parashikojë më mirë fjalëkalimet më të sofistikuara duke i hapur rrugë thyerjes më të shpejtë dhe në shkallë të gjerë të fjalëkalimeve.

PassGAN u ushqye me 15 milionë fjalëkalime nga sulmi 2009 RockYou, të dhëna të cilat përdoren masivisht për trajnimin e mjeteve të tilla. Fjalëkalimet nën 4 karaktere dhe mbi 18 karaktere u lanë jashtë testimit.

Edhe Tech 8 gus 2023 Inteligjenca artificiale mund të identifikojë fjalëkalimet nga tingulli i tasteve që shtypen

Fjalëkalimet me 4 karaktere thyheshin menjëherë. Në tërësi mjeti arriti të thyen 51 për qind të fjalëkalimeve në 1 minutë, 65 për qind në një orë, 71 për qind në një ditë dhe 81 për qind në një muaj.

Bazuar në gjetjet e tyre, Home Security Heroes këshillon shmangien e ripërdorimit të fjalëkalimeve, ndryshimin e shpeshtë të tyre dhe përdorimin e fjalëkalimeve me mbi 15 karaktere.