Meta nis këtë vit testimin e mjeteve të përmbajtjes për reklamuesit

Kompania teknologjike Meta, ka njoftuar të enjten se do të ndërtojë mjete të reja për të lejuar markat të parandalojnë shfaqjen e reklamave të tyre pranë përmbajtjeve të papërshtatshme në Facebook dhe në Instagram.

Siç ka bërë të ditur kompania, testimi i këtyre mjeteve do të fillojë gjatë këtij viti, në mënyrë që të lansohen në fillim të vitit 2023.

Kompania e rrjeteve sociale ka thënë se për të siguruar verifikimin e jashtëm që reklamat shfaqen vetëm pranë përmbajtjes së përshtatshme, ka zgjedhur që të ketë partneritet me firmën e matjes së reklamave, Zefr.

Kjo lëvizje është pjesë e përgjigjes së Metës ndaj kërkesave të kahershme nga industria e reklamave, e cila ka bërë thirrje që markave t'u jepet një kontroll më i madh se ku shfaqen reklamat e tyre në internet.

Reklamuesit kanë kërkuar mjete për t'i ndihmuar ata të personalizojnë dhe të parandalojnë shfaqjen e reklamave ngjitur me përmbajtjen që marka e konsideron të papërshtatshme, të tilla si politika ose lajmet për vdekjen ose dhunën, raporton Reuters.

Meta tha se kontrolle të tilla së pari do të ndërtojë për burimet e Facebookut dhe Instagramit për tregjet anglishtfolëse.