Google sugjeron “diçka të madhe” për linjën Pixel

Si duket nuk do të duhet ta presim vjeshtën që të mësojmë për risitë për pajisjet Pixel. Google e ka publikuar teaserin në të cilin premton se "diçka e madhe po vjen në ekosistemin Pixel" më 7 maj. Klipi përcjellës ishte vetëm promovim i stikerit AR me temën Avengers: Endgame, por është e sigurt se kompania po përgatit diçka më të madhe. Ka gjasa të mëdha që do t’i shohim telefonat e rinj Pixel 3a, raporton Engadget.

Google kohët e fundit sugjeroi përmes dyqanit të vet online për ekzistimin e Pixel 3a dhe 3a XL ndërsa 7 maji përkon me ditën e parë të konferencës së sivjetme vjetore të kompanisë për developerë, I/O.

Nëse muajin e ardhshëm vërtetë shfaqen telefonat Pixel 3a, kryesisht e dimë se çfarë mund të presim nga pajisjet. Shumica e thashethemeve kanë theksuar se Pixel 3a të ketë ekran 5.6-inçësh, çipset Snapdragon 670, 4GB RAM dhe kamerë 12MP me funksione Pixel Visual Core të cilat i ka edhe premiumi Pixel 3. Nga ana tjetër, Pixel 3a XL do të duhej të ketë ekran 6-inçësh dhe ndoshta edhe çipsetin Snapdragon 710, shkruan KOHA Ditore.

Google planifikon ta bëjë linjën Pixel edhe më të përballueshme, pas disa vitesh të rritjes së çmimeve për pajisjet e veta.