Google e ka një mënyrë “të re” të krijimit të ngjarjeve në kalendar

Vitin e kaluar, gjatë kësaj periudhe, Google ka shtuar shkurtore interesante për përdoruesit e rregullt të aplikacioneve G Suite, duke e mundësuar krijimin shumë të shpejtë të dokumenteve të reja, raporton Mashable.

Me ndihmën e domenit .new, Google e ka shtuar një funksion për krijimin e shpejtë të dokumenteve, tabeleve, slajdeve, sajteve ose formulareve të reja të Google thjesht duke e shtypur doc.new, sheet.new, slide.new, site.new ose form.new direkt në fushën për adresat e browserit. Tani funksioni është zgjeruar edhe në Google Calendar.

Google, gjithashtu, tha në tweetin e vet se është e mundur të shkruani cal.new ose meeting.new në browser dhe të mundësoni që një ngjarje e re e Calendar të ekzekutohet në tab, shkruan KOHA Ditore. Përdorimi i kësaj shkurtoreje kursen kohë, e cila do të përdorej më herët për ta hapur aplikacionin Calendar dhe për ta shtuar një ngjarje të re.

Për ata me më shumë se një llogari të Google, kompania e ka shtuar funksionin, i cili ia mundëson shkurtores të krijojë ngjarje të reja në disa llogari. Nëse jeni loguar në dy llogari të Google, mund ta shtoni ngjarjen e re Calendar në llogarinë tjetër duke e shkruar cal.new/2/ ose meeting.new/2/.