Gjerdanët dhe aksesorët që pretendojnë se "mbrojnë" njerëzit nga rrjetet celulare 5G, është gjetur të jenë radioaktive.
Autoriteti holandez për sigurinë bërthamore dhe mbrojtjen nga rrezatimi (ANVS), lëshoi një paralajmërim për dhjetë produkte që zbuloi se lëshonin rrezatim të dëmshëm jonizues.
Ky autoritet u bëri thirrje njerëzve që të mos përdorin produktet, të cilat mund të shkaktojnë dëm me konsumimin afatgjatë. Ndërkohë, nuk ka asnjë provë që rrjetet 5G janë të dëmshme për shëndetin.
Organizata Botërore e Shëndetësisë (OBSH) ka thënë se rrjetet celulare 5G janë të sigurta dhe nuk ndryshojnë thelbësisht nga sinjalet ekzistuese 3G dhe 4G.
Rrjetet celulare përdorin valë radio jojonizuese që nuk dëmtojnë ADN-në.
Pavarësisht kësaj, ka pasur sulme ndaj transmetuesve, nga njerëz që besojnë se rrjetet 5G janë të dëmshme.
Produktet e identifikuara si të dëmshme nga ANVS-ja përfshinin një maskë gjumi "Energy Armor", byzylyk dhe gjerdanë.
Një byzylyk për fëmijë, i quajtur Magnetix Wellness, u zbulua gjithashtu se lëshonte rrezatim.
"Mos e vishni më, vendoseni në mënyrë të sigurt dhe prisni udhëzimet e kthimit," tha ANVS në një deklaratë.
Shitësve në Holandë u është thënë se shitja është e ndaluar dhe duhet të ndërpritet menjëherë dhe se ata duhet të informojnë klientët e tyre për këtë.
Teoritë e konspiracionit kanë nxitur një treg të pajisjeve "anti-5G" për të cilat është zbuluar se nuk kanë asnjë efekt.
Në maj të vitit 2020, Standardet Tregtare të Mbretërisë së Bashkuar u përpoqën të ndalonin shitjet e një USB-je me vlerë 339 funta që pretendonte se ofronte "mbrojtje" nga 5G.
Të ashtuquajturat "ngjitës kundër rrezatimit" janë shitur edhe në Amazon.
ANVS ka publikuar në faqen e saj të internetit një listë të plotë të produkteve që i ka identifikuar si radioaktive.