Dokumentacioni i zbulon detajet e çipit Snapdragon 735

Disa javë më parë Qualcomm prezantoi çipsetin Snapdragon 730, por si duket kompania po planifikon ta publikojë edhe modelin Snapdragon 735. Është paraqitur ai që duket si dokumentacion i brendshëm, me detaje mbi specifikimet kryesore të çipsetit, transmeton GSMArena.

Çipi do të krijohet në procesin 7nm, si modeli aktual premium Snapdragon 855. Ai do ta përdorë një CPU tetëbërthamëshe në konfigurimin 1 + 1 + 6. Shpejtësitë e pritura të takteve janë 1 x 2.9GHz + 1 x 2.4GHz + 6 x 1.8GHz, ndërsa bërthamat Kryo 400 me siguri do të jenë derivate Cortex-A76 me dy kryesore, ndërsa gjashtë të tjerat do të jenë Cortex-A55.

GPU-ja Adreno 620 do ta ketë një takt prej 750MHz, ndërsa Snapdragon 735 do të ketë edhe NPU220 @ 1GHz për operacionet e menaxhuara nga inteligjenca artificiale. Përveç kësaj, Snapdragon 735 do të ketë gjithashtu modem 5G, shkruan KOHA Ditore.

Burimi i dokumentit më të ri është i njëjti i cili edhe një vit më parë kishte sjellë informata të hershme për Snapdragon 730, e që ishin përgjithësisht të sakta, kështu që është e mundur që edhe këtë herë kemi informacion të besueshëm për çipin e ri.