Shtetet e Bashkuara të Amerikës dhe Japonia kanë nisur një dialog të ri ekonomik të nivelit të lartë të premten, me qëllim që të zmbrapsin Kinën dhe të kundërshtojnë përçarjen e shkaktuar nga pushtimi rus në Ukrainë, shkroi të shtunën Reuters.
Dy aleatët për një kohë të gjatë kanë rënë dakord të krijojnë një qendër të re të përbashkët kërkimore për gjysmëpërçuesit e gjeneratës së ardhshme, gjatë të ashtuquajturit takim ministror ekonomik “dy plus dy” në Uashington, ka thënë ministri japonez i Tregtisë, Koichi Hagiuda.
Sekretari amerikan i Shtetit, Antony Blinken, Sekretarja amerikane e Tregtisë, Gina Raimondo, ministri i Jashtëm japonez, Yoshimasa Hayashi dhe Hagiuda diskutuan gjithashtu për energjinë dhe sigurinë ushqimore, thanë zyrtarët në një konferencë shtypi.
"Si ekonomitë e para dhe të treta më të mëdha në botë, është thelbësore që ne të punojmë së bashku për të mbrojtur rendin ekonomik të bazuar në rregulla, një në të cilin të gjitha vendet mund të marrin pjesë, të konkurrojnë dhe të përparojnë”, tha Blinken në seancën e hapjes.
Ai shtoi se ngjarjet e fundit botërore, përfshirë pandeminë COVID-19 dhe luftën në Ukrainë, kishin treguar cenueshmërinë e zinxhirëve kritikë të furnizimit, ndërsa një numër në rritje vendesh po luftonin me barrën e borxhit për shkak të praktikave të paqëndrueshme dhe jo transparente të huadhënies.
“Praktikat ekonomike shtrënguese dhe hakmarrëse të Republikës Popullore të Kinës i detyrojnë vendet në zgjedhje që komprometojnë sigurinë e tyre, pronën intelektuale, pavarësinë e tyre ekonomike”, tha ai.
Hayashi i Japonisë e quajti pushtimin rus të Ukrainës një sfidë serioze për rendin ndërkombëtar.
