Uebfaqet e një prej gazetave më të mëdha portugeze dhe të një prej transmetuesve kryesor, të dy në pronësi të konglomeratit më të madh mediatik të këtij vendi “Impresa”, janë mbyllur të hënën pasi janë goditur nga një sulm hakerësh gjatë fundjavës së parë të janarit.
Gazeta Expresso dhe stacioni televiziv SIC thanë se e raportuan incidentin në departamentin e hetimit kriminal të Policisë dhe Qendrën Kombëtare të Sigurisë Kibernetike dhe se do të bënin një ankesë.
Hakerët e supozuar, të cilët e quanin veten “Lapsus$ Group”, publikuan një mesazh në faqet e internetit duke thënë se të dhënat e brendshme do të zbuloheshin nëse grupi mediatik nuk do të paguante një shpërblim. Mesazhi përfshinte e-mail dhe informacione kontakti në Telegram, raporton Reuters.
Lapsus$, të cilët pretendojnë se ka fituar akses në llogarinë e Shërbimeve Ueb të Impresa-s në Amazon, dërgoi gjithashtu një e-mail abonentëve të Expresso dhe postoi në Twitter nga llogaria e verifikuar e gazetës në këtë rrjet social.
I njëjti grup dyshohet se ka hakuar faqen e internetit të ministrisë së shëndetësisë të Brazilit muajin e kaluar, duke hequr disa sisteme, duke përfshirë një me informacione që lidhen me programin kombëtar të imunizimit dhe një tjetër të përdorur për lëshimin e certifikatave dixhitale të vaksinimit.
Faqet e internetit të Expresso dhe SIC janë jashtë linje që nga e diela, me faqet që tregojnë një mesazh që thotë se ato janë "përkohësisht të padisponueshme" pas sulmit dhe do të kthehen "sa më shpejt të jetë e mundur".
Ndërkohë, të dyja mediet po publikojnë lajme në kanalet e tyre të rrjeteve sociale. Këtë sulm e kanë quajtur “të paprecedentë ndaj lirisë së shtypit në epokën dixhitale”.
© KOHA. Të gjitha të drejtat janë të rezervuara.
