Google-it i rekomandohet të refuzojë certifikimin e telefonave të mençur që komprometojnë privatësinë

Google-it i rekomandohet të refuzojë certifikimin e telefonave të mençur që komprometojnë privatësinë

28 January 2020 14:20

Fondacioni Metamorfozis, në Ditën Evropiane të Mbrojtjes së të Dhënave Personale, iu bashkua iniciativës së Privacy International kundër përdorimit eksploatues të aplikacioneve të parainstaluara në telefonat e mençur që përdorin Android, njofton ky fondacion.

Privacy International, me mbështetjen e më shumë se 50 organizatave në të gjithë botën, publikoi një letër të hapur dërguar Sundar Pichait, drejtor ekzekutiv i Alphabet Inc., kompani amë e Google, në të cilën kërkon nga Google që të ndërmarrë masa kundër përdorimit të aplikacioneve të parainstaluara në telefonat e mençur që përdorin Android. Përmes kësaj iniciative dërgohet paralajmërimi, por gjithashtu bëhet thirrje për veprim nga prodhuesit e telefonave të mençur, të cilët e vendosin fitimin përpara privatësisë së shfrytëzuesve, duke instaluar aplikacione në pajisje me çmim të ulët të shitjes.

Kërkesa dërguar Google-it është e qartë, të rishikohen parametrat standarde të privatësisë dhe të sigurisë që janë të futura në telefonat e mençur me çmim të ulët të shitjes, e që kanë të bëjnë me aplikacionet e parainstaluara, të cilat përdoruesit nuk kanë mundësi t’i fshijnë dhe të cilat mund ta komprometojnë privatësinë e tyre. Rekomandimet kanë të bëjnë me sigurimin e:

-mundësisë që përdoruesit vetë t’i fshijnë përgjithmonë aplikacionet e parainstaluara, si dhe të gjitha shërbimet që janë aktive në prapavijë;

-mundësive të njëjta për kontroll të sigurisë dhe të privatësisë në aplikacionet e parainstaluara sikurse për atë që janë të disponueshme në Google Play Store;

-mundësi të njëjta për azhurnim, mundësisht përmes përdorimit të mekanizmave për azhurnim të Google Play dhe pa përdorimin e profilit të përdoruesit;

Për më tepër, rekomandohet që Google të refuzojë të bëjë certifikimin e telefonave të mençur, prodhuesit ose shitësit e të cilëve përpiqen ta komprometojnë privatësinë e përdoruesve përmes aplikacioneve të parainstaluara.

Përmbajtja e plotë e letrës mund të gjendet në linkun e mëposhtëm https://action.privacyinternational.org/node/9.

Fondacioni Metamorfozis, përmes programit Të drejtat e njeriut në internet, synon ta marrë rolin udhëheqës në procesin e përfaqësimit për të drejtat e njeriut, duke u ndihmuar komuniteteve të përballen me ndryshimet e mëdha që vijnë nga ndikimi në rritje i teknologjive të reja. Metamorfozis përqendrohet në mbrojtjen e privatësisë duke i forcuar kapacitetet e qytetarëve, institucioneve dhe sektorit të biznesit për të funksionuar në një shoqëri digjitale.

Komentet

Shto koment

Të ngjashme