Yj të rinj, probleme të vjetra për Unitedin në Champions

Me Cristiano Ronaldon të kthyer në Manchester United, dështimi për të kaluar fazën e grupeve në Ligën e Kampionëve për sezonin e tretë rresht është e paimagjinueshme.

Megjithatë, të njëjtat probleme u bartën nga kampanja e dështuar e sezonit të kaluar në atë që filloi keq të martën në Zvicër - gabime në mbrojtje plus gabimet në disiplinë që çuan në një karton të kuq në momentin më të papërshtatshëm për Unitedin. Edhe transferimet e reja, Ronaldo e Raphael Varane - katër herë fitues të Ligës së Kampionëve me Real Madridin - nuk arritën ta shpëtojnë ekipin e shtrenjtë dhe të mbushur me yje të Manchester Unitedit nga humbja e pashpjeguar të martën mbrëma ndaj Young Boysit, në ndeshjen e parë të Grupit F të Championsit. Kështu që, Unitedi pësoi një humbje tjetër me rezultat 2:1 nga ekipi i rangut më të ulët që e ka në grup, i cili përbëhet edhe nga Villarreali e Atalanta.

“Ndaj Young Boysit, ne e përsëritëm atë që e bëmë vitin e kaluar në Evropë dhe kjo nuk është aspak mirë”, pranoi trajneri i Unitedit, Ole Gunnar Solskjaer, duke kujtuar dy kundërsulme të turpshme kundër Bashakshehirit që i kushtuan me humbje.

Dhe, të njëjtën gjë Unitedi e bëri edhe ndaj Young Boysit, ku e humbi ndeshjen në sekondat e fundit.

Një pasim i ngadaltë në kohën shtesë të ndeshjes nga Jesse Lingard, i cili zëvendësoi Ronaldon që e kaloi Unitedin në epërsi në pjesën e parë, i dha mundësinë sulmuesit amerikan Jordan Siebatcheu që t’ia sigurojë fitoren skuadrës së Young Boysit.

Edhe Sport 29 tet 2021 Presioni rritet mbi yjet e Unitedit për ta dëshmuar vlerën e tyre

“Ky është futbolli në nivelin më të lartë të garave. Mjafton një mungesë e përqendrimit dhe ndëshkoheni në gabimin më të vogël”, tha Solskjaer.

Lideri i Premier Leagues ishte nën presion nga minuta e 35-të kur mbrojtësi Aaron Wan-Bissaka u ndëshkua me karton të kuq për një ndërhyrje të pakontrolluar. Duke udhëhequr 1:0 me golin e Ronaldos në minutën e 13-të, Unitedi nuk arriti të kishte asnjë goditje në portë për pjesën tjetër të ndeshjes. Kartoni i kuq i kushtoi shumë Unitedit, sikurse edicionin e shkuar kur mesfushori Fred u përjashtua në duelin kundër Paris Saint-Germainit. Atëbotë, Unitedi e humbi ndeshjen në shtëpi 3:1 dhe nuk arriti të avancojë përtej fazës së grupeve, ndonëse ishte lider i grupit. Kjo bëri që ekipi anglez të vazhdojë garat në Ligën e Evropës ku arriti deri në finale për t’u mposhtur nga Villarreali pas penalltive.

“Të gjithë menduan se ne kishim përfunduar të parët në grup pas dy ndeshjeve që i fituam sezonin e kaluar”, ka kujtuar Solskjaer, ekipi i të cilit gjithashtu mposhti Leipzigun 5:0 tetorin e kaluar dhe më pas humbi ndeshjen vendimtare të fundit të fazës grupeve në Gjermani. “Besoj se humbja nga Young Boysi është një mësim i mirë, në mënyrë që mos të përsëritet historia”.

Historia e menaxhimit të Solksjaerit në Ligën e Kampionëve ka qenë me ngritje dhe ulje prej se ka ardhur në krye të Manchester Unitedit. Skuadra e tij ishte dy herë triumfuese në PSG - përfshirë në raundin e 1/8 së finales më 16 mars të vitit 2019 - por tani ai ka humbur shtatë nga 11 ndeshje në këtë garë.

“Ne e dimë se i kemi dhënë vetes këtë edicion një detyrë më të vështirë sesa në vitin e kaluar”, tha Solsjkaer. “Na duhen 10 apo 12 pikë për të avancuar nga grupi. Duhet patjetër t’i fitojmë ndeshjet që i luajmë në shtëpi. Kështu që, duhet të fokusohemi tërësisht në këto ndeshje”.

Dy duelet e radhës në Champions, Manchester Unitedi i luan në stadiumin “Old Trafford”. Kundërshtari i ardhshëm është Villarreali, ekip që e mposhti në finalen e Ligës së Evropës në maj të këtij viti. Ky duel luhet më 29 shtator. Kështu që, Unitedi nuk po dëshiron që edhe këtë sezon të eliminohet nga grupi i Championsit për të luajtur në Ligën e Evropës. Këtë e ka pranuar edhe Solskjaer.

“Nuk po mendojmë për një rang më të ulët”, insistoi ai.

Ronaldo kurrë nuk ka luajtur në Ligën e Evropës për Unitedin, Real Madridin apo Juventusin. Ai i ka vetëm dy paraqitje në Kupën e UEFA-s në vitin 2002 me Sportingun e Lisbonës kur ishte 17-vjeçar.

Edhe Sport 1 tet 2021 Solskjaer i detyruar t’i “menaxhojë” minutat e Ronaldos, për ta ruajtur ndikimin e portugezit

Tani me një rekord të Ligës së Kampionëve me 135 gola të shënuar dhe me rekordin që ia barazoi Iker Casillasit me 177 ndeshje, Ronaldo ka kohë ta kthejë ekipin e tij në rrugën e duhur në një garë që ndihmoi klubin ta fitojë më 2008.

“Është me fat që ishte vetëm ndeshje e parë në fazën e grupit dhe ne tani kemi më shumë kohë për t’u kthyer fuqishëm në ndeshjet tjera”, shtoi kapiteni i Unitedit, Harry Maguire.