Me vetëm 16 vjeç, sulmuesi i ri, Lamine Yamal, arriti një tjetër moment historik të premten kur u thirr për herë të parë në Përfaqësuesen A të Spanjës. Yamal mund të bëhet lojtari më i ri i Spanjës në ndeshjet e ardhshme kualifikuese për “Euro 2024” kundër Gjeorgjisë dhe Qipros. Nëse selektori Luis de la Fuente e inkuadron adoleshentin në ndeshjet që Spanja i luan më 8 dhe 12 shtator, atëherë Yamal do të thyente rekordin e bashkëlojtarit të tij te Barcelona, Gavit. Mesfushori Gavi u bë lojtari më i ri që luajti për Spanjën gjatë fitores në gjysmëfinale të Ligës së Kombeve ndaj Italisë në moshën 17 vjeç e 62 ditë, në tetor të vitit 2021. Gavi theu rekordin e vendosur në vitin 1936 nga Angel Zubieta Redondo, i cili e veshi fanellën e Spanjës në moshën 17 vjeçe e 284 ditë në një ndeshje miqësore.
Stafeta tani mund të merret nga Yamal, që mund të shtojë një rekord të ri në një koleksion në rritje, i cili filloi kur ai u bë debutuesi më i ri i Barcelonës në La Liga, kundër Real Betisit në prill me vetëm 15 vjeç e 9 muaj.
“Jam shumë i lumtur që mund të arrij këtë rekord, por shpresoj se mund të thyej më shumë”, tha lojtari i ri që mund të luajë në të tri pozicionet sulmuese, për faqen e klubit në atë kohë.
Katër muaj më vonë Yamal shkëlqen te Barça, ku largimi i Ousmane Dembele në Paris Saint-Germain dhe pezullimi me dy ndeshje i Raphinhas i dhanë atij një shans të madh për të bërë përshtypje. Ai u bë titullari më i ri i La Ligas në shekullin e XXI kundër Cadizit dhe më pas luajti edhe ndaj Villarrealit, ku u shpall edhe lojtari i ndeshjes. Në “Estadio de la Ceramica” të dielën e kaluar, paraqitja e tij fantastike bëri që Yamal të duartrokitet nga të gjithë kur u zëvendësua nga Ansu Fati.
“Për fat të mirë luaj pa frikë, përpiqem vetëm të luaj futboll, gjë në të cilën jam i mirë”, tha Yamal. “Mamaja ime ka pak frikë kur luaj si titullar, por më mbështet shumë”.
Trajneri i Barcelonës, Xavi Hernandez, tha se ai beson fuqishëm në potencialin e Yamalit. Madje, Xavi beson se Yamal është lojtar që mund të shkëlqejë në klub gjatë shumë vjetëve të ardhshëm.
“Ai është një lojtar që bën diferencën, i zgjuar. Vendimi që merr është pothuajse gjithmonë i saktë dhe i mirë”, tha Xavi. “Kjo është gjëja më e mirë për të, në moshën 16-vjeçare”.
Sipas raporteve, Xavi shpejt filloi të ndiqte përparimin e të riut në radhët e të rinjve të klubit kur ai mbërriti në vitin 2021 si trajner te Barcelona. I lindur në Katalonjë nga babai maroken dhe nëna e Guinesë Ekuatoriale, Yamal iu bashkua Barçës në moshën shtatëvjeçare dhe u thirr në ekipin e parë para se të bënte paraqitje për ekipin rezervë. Një lojtar i shpejtë, i aftë dhe shpërthyes, Yamal ka qenë gjithashtu i përhershëm në formacionin e të rinjve të Spanjës dhe tani ka mundësinë të vazhdojë të lërë gjurmë me ekipin A.
“Kam përzgjedhur një listë me lojtarë të rinj, me Lamine Yamalin, që është një lojtar i madh dhe ka të ardhme të ndritur. Ai është një lojtar që garanton për të ardhmen dhe ftesa i ka shkuar në momentin e duhur”, ka thënë përzgjedhësi i Spanjës, De La Fuente.
