Kosova synoi medalje për Kampionatin Evropian për kadet në Lituani dhe një gjëje të tillë ia arriti. Shpat Zeka dhe Laura Fazliu triumfuan për medaljet e bronzta, dhe me sukses e përfunduan këtë garë, e nga ana tjetër, Erza Muminoviq u mposht në luftën e parë.
17-vjeçari Zeka që garoi në kategorinë deri në 90 kg, e nisi rrugën e të bronztës me humbje nga xhudisti gjeorgjian, Bekauri Mikheili, raporton TCH.
Mirëpo, në repesazhë, Shpati u këndell dhe i filloi fitoret e njëpasnjëshme. Së pari e mposhti francezin Evan Courties me një Wazzari e një Ippon.
Në ndeshjen e tretë, Zeka u ndesh me rusin Said Gadzhiev, dhe e fitoi luftën me një Wazzari.
Csaba Toth ishte viktima e radhës për xhudistin premtues nga Kosova, të cilin Zeka e mposhti me Ippon.
Dhe në luftën finale për vendin e tretë dhe medaljen e bronztë, Zeka u tregua më i suksesshëm se estonezi Simon Sulla, duke triumfuar me një Wazzari e një Ippon, për t’u ngjitur më pas në podium.
Kosova të bronztën e mori edhe në konkurrencën e femrave me Laura Fazliun.
Fazliu që garon në kategorinë deri në 63 kg, në luftën e parë e mposhti greken Zoe Spyropoulou me Ippon.
Garuesja premtuese e xhudos e vazhdoi formën e mirë edhe përballë Stine Marie Roesaeg nga Norvegjia, duke triumfuar me dy Wazzari.
Mirëpo, Fazliu u mposht në luftën e tretë nga sllovenia Zarja Tavcar, kurse në repesazhë shënoi fitore ndaj spanjolles Irene Hernaez Camus, me një Wazzari e një Ippon.
Në përballjen e pestë, Laura e mposhti bullgaren Lidia Brancheva me një Wazzari e një Ippon, kurse në podium me medalje të bronztë u ngjit pasi në luftën e gjashtë doli më e suksesshme edhe se Anneta Mosr nga Luksemburgu, pas një Wazzari e një Ipponi.
Përfaqësuesja e Kosovës e pati edhe Erza Muminoviq në kategorinë deri në 44 kg, por që dështoi të triumfonte pasi u mposht me Wazzari që në luftën e parë nga francezja Coralie Gilly.
Tani synim i xhudistëve nga Kosova është paraqitja sa më e mirë në Kampionatin Botëror që mbahet në Budapest të Hungarisë, prej datës 28 gusht deri më 2 shtator.