Real Madridit iu dha një frikë e madhe nga Chelsea të martën mbrëma, por shkëlqimi i përjetshëm i Luka Modriqit dhe Karim Benzemas mbizotëroi dhe tani madrilenët ia kanë vënë syrin trofeut të 14-të evropian, përcjell AFP. Me stadiumin “Santiago Bernabeu” pothuajse bosh, me përjashtim të tifozëve të Chelseat që ende këndonin në këndin më të lartë, më poshtë bisedat ishin kthyer tashmë në arritjen e Realit jo vetëm në finale, por për ta fituar përsëri turneun.
“Askush nuk mund të thotë se nuk do ta fitojmë atë”, tha trajneri i Realit, Carlo Ancelotti.
Kjo do të jetë gjysmëfinalja e tetë e Real Madridit në dhjetë vjetët e fundit dhe nga shtatë finalet e mëparshme, ata u kurorëzuan katër herë kampionë. Që nga fillimi i epokës së Ligës së Kampionëve, Reali ka arritur në 15 gjysmëfinale në total dhe në shtatë nga ato raste e ngriti trofeun. Ky do të jetë me siguri një vit veçanërisht i vështirë, me Manchester Cityn dhe Liverpoolin, që në mënyrë të qartë janë për një nivel mbi pjesën tjetër të elitës evropiane. Madridit nuk i është dhënë asnjë favor me shortin. Pasi mposhti Paris-Saint Germain në 1/8 e finales dhe Chelsean në çerekfinale, rruga e tyre më e mundshme tani është City në gjysmëfinale dhe Liverpooli në finale të Championsit. Kjo ka jehonë të ecurisë së tyre të pabesueshme drejt trofeut në vitin 2018, kur ata gjithashtu duhej të kalonin shumicën e favoritëve, duke përfshirë PSG-në, Juventusin, Bayernin dhe më pas Liverpoolin në finale. Liverpooli është një ekip tjetër tani, ndoshta edhe në kulmin e formës nën Jurgen Kloppin, ndërsa Real Madridi është një version i reduktuar i vetes katër vjet më vonë, me Cristiano Ronaldon e Sergio Ramosin që janë larguar dhe Gareth Balen që nuk po konsiderohet më lojtar i rëndësishëm.
Duke pasur parasysh rekordin e tyre në derbi, Madridi do të donte të përballej me Atletico Madridin në gjysmëfinale. Një përballje me Cityn, i cili fitoi bindshëm kur u takuan në dy ndeshjet në vitin 2020, sigurisht se e bën ekipin e Pep Guardiolas favorit absolut. Megjithatë, Real Madridi do të besojë se ka mjaft cilësi për ta përballur Cityn. Në fakt, e ka Benzeman që po ka ndikim më shumë se kurrë në ekip. Francezi është lojtari më i rëndësishëm dhe ka shansin ta udhëheqë Realin drejt trofeut të Ligës së Kampionëve. Ai është më i merituari që Reali është kualifikuar në gjysmëfinale, me shtatë gola të shënuar në tri ndeshjet e fundit, duke përfshirë dy “hat-tricka”. Ky trofe mund t’ia sigurojë Benzeman edhe “Topin e Artë”. Modriqi tregoi kundër Chelseat, me atë pasimin magjepsës për Rodrygon me pjesën e jashtme të këmbës së djathtë, se si mund të manipulojë ende netët më të mëdha në favor të Real Madridit. Në moshën 36-vjeçare, ekziston një argument i fortë për të thënë se Modriqi po luan më mirë se kurrë.
“Ne ishim të vdekur deri në golin që shënuam”, tha Modriq. “Ne nuk u dorëzuam. Ne vazhduam të besojmë, vazhduam të luftonim”.
Me këta të dy, Reali ka lojtarë që garantojnë suksesin, por ka edhe të tjerë që nuk mund të anashkalohen. Thibaut Courtois pretendon të jetë portieri më i mirë në botë pas një sezoni të mrekullueshëm. Vinicius Junior, i cili asistoi në golin me kokë të Benzemas, është shfaqur si një nga sulmuesit e krahut më frikësues në botë. Toni Kroos është ende një mjeshtër i kontrollit. David Alaba dhe Eder Militao kanë siguruar që Ramos dhe Raphael Varane të mos mungojnë. Duhet të ketë gjithashtu një avantazh në kontekstin më të gjerë të sezonit të Madridit.
Edhe
Modriqi në historinë e Ligës së Kampionëve
Lufta e ngushtë e Liverpoolit dhe Manchester Cityt për titullin e Premier Leagues u ofron atyre pak hapësirë për manovrim dhe Villarreali do të fokusohet pothuajse plotësisht në Ligën e Kampionëve, Atletico Madridi ende po lufton për të përfunduar në top-katërshen e La Ligas. Në krahasim, epërsia prej 12 pikësh e Real Madridit në krye të La Ligas do të thotë se ata mund të përdorin ndeshjen kampionale për të bërë rotacion dhe rifreskuar, duke i mbajtur veteranët në gjendje të mirë për gjysmëfinale. Madje, edhe ishte duke humbur 3:0 nga Chelsea, Real Madridi nuk shfaqi panik për asnjë moment. Ata e dinin se një moment ishte gjithçka që do të duhej për të përkulur një tjetër prej këtyre ndeshjeve nervozuese sipas dëshirës së tyre.
“Në Bernabeu, asgjë nuk humbet kurrë”, tha Ancelotti. “Nuk mund ta shpjegoj, por ka një magji në këtë stadium”.
Është shpërblimi psikologjik që vjen nga mbajtja e 13 kupave evropiane dhe - për lojtarë, si: Modriq, Benzema, Casemiro dhe Kroos - fitimi i katër trofeve në pesë vjet. Tani ata i kanë sytë tek i pesti.
