Skuadra nga La Liga, Osasuna, ka fituar betejën ndaj UEFA-s dhe është kthyer në garat e Ligës së Konferencës, pasi e dërgoi çështjen e saj në Gjykatën e Arbitrazhit Sportiv (CAS).
Klubi spanjoll të martën ka bërë të ditur se i është anuluar përjashtimi nga Liga e Konferencës, pas arritjes së marrëveshjes me UEFA-n, e cila u nënshkrua edhe nga CAS-i.
Konfederata Evropiane e Futbollit (UEFA) para tri javësh e kishte përjashtuar Osasunan nga niveli i tretë i garave të saj për shkak se ish-zyrtarë të klubit spanjoll ishin përfshirë në kurdisje të ndeshjeve para një dekade. Osasuna kundërshtoi vendimin e UEFA-s duke insistuar se menaxhmenti aktual nuk ishte i përfshirë në manipulimin e ndeshjeve, i cili sipas rregullave të UEFA-s për garat e klubeve kërkon përjashtim për një vit, nëse kurdisja ka ndodhur që nga viti 2007 kur UEFA i përditësoi statutet e saj ligjore.
Klubi nga Pamplona dërgoi ankesë në CAS për të shpëtuar kualifikimin e tij të parë në garat e UEFA-s pas 17-të vjetësh, të cilin e arriti pasi edicionin e fundit në La Liga e përfundoi në pozitën e shtatë në tabelë. Në njoftimin e lëshuar të martën, Osasuna tha se “pëlqimi” për t’u kthyer këtë edicion në Ligën e Konferencës u sigurua nga UEFA dhe u ratifikua nga CAS-i.
“Osasuna do të luajë në Ligën e Konferencës në edicionin 2023/24, pasi sot ka përfunduar procedura në Gjykatën e Arbitrazhit Sportiv (CAS). Me provat e reja të ofruara nga klubi, UEFA ka arritur në përfundim se Osasuna ka qenë viktimë e ngjarjeve të ndodhura gati një dekadë më parë. Rrjedhimisht UEFA e konsideron Osasunën të kualifikuar për të marrë pjesë në këtë edicion në garat e Ligës së Konferencës”, thuhej ndër të tjera në njoftimin e klubit spanjoll.
Ndërkohë, UEFA nëpërmjet një deklarate tha se Osasuna kishte ofruar dëshmi të reja, të cilat nuk ishte në gjendje t'i depozitonte në një fazë të hershme.
“UEFA e rishikoi materialin dhe doli në përfundimin se Osasuna nuk ishte përfshirë në aktivitete të trukimit të ndeshjeve”, tha organi evropian i futbollit.
Bazuar në këtë, Osasuna do të jetë e pranishme në shortin e plejofit të Ligës së Konferencës që do të tërhiqet më 7 gusht. Ndeshjet e plejofit do të zhvillohen më 24 dhe 31 gusht, ndërsa nëse Osasuna avancon në fazën e grupeve të kësaj gare atëherë do të shpërblehet me 6 milionë euro nga UEFA.
Si rezultat i këtij vendimi, Athletic Bilbao nuk do të paraqitet në plejofin e Ligës së Konferencës për shkak se e zëvendësoi Osasunën kur u përjashtua nga UEFA. Bilbao edicionin e fundit u rendit në pozitën e tetë.
Osasuna ende përballet me një hetim disiplinor të veçantë, por më pak serioz nga UEFA, për dërgimin e çështjes në një gjykatë lokale jashtë sistemit gjyqësor të futbollit. Këtë e ka konfirmuar edhe Osasuna duke bërë me dije se do ta pranoj çdo dënim të UEFA-s, por i cili nuk do të jetë pengesë për të luajtur në Ligën e Konferencës.
“UEFA ka hapur procedurë disiplinore ndaj Osasunës, e cila nuk do të pengojë pjesëmarrjen e klubit në Ligën e Konferencës. Klubi do të pranojë dënimin nga UEFA, ndaj të cilit nuk do të apelojë”, vazhdoi njoftimi i Osasunas.