Pak orë pasi njoftoi për shkëputjen e kontratës me Neven Plantakun, KB Trepça njoftoi për angazhimin e trajnerit të ri. Bëhet fjalë për trajnerin nga Turqia, Serhat Sehit që do ta zëvendësojë Plantakun në postin e trajnerit deri në fund të këtij edicioni.
Lajmi është konfirmuar të enjten nga skuadra e Trepçës në faqen e “Facebookut”.
“Në krye te shtabit teknik klubi ka angazhuar trajnerin turk Serhat Sehit, i cili do ta udhëheqë ekipin deri në përfundim të sezonit. Serhat Sehit në supet e veta ka përvojë si ndihmëstrajner i Përfaqësueses A të Turqisë, si dhe ka udhëhequr disa ekipe në ligën e parë turke”, thuhet në njoftim.
Sehit do të jetë trajneri i dytë turk në Superligën e Kosovës në basketboll pasi ditë më parë edhe skuadra e Golden Eagle Yllit e angazhoi Fatih Emre Gezerin.