Tucheli nën presion te Bayerni, Dortmundi gati për t’ia rrëmbyer titullin

Pa fajin e tij, trajneri i Bayern Munichut, Thomas Tuchel, është tashmë nën presion të jashtëzakonshëm pas vetëm dy ndeshjeve në krye të ekipit. Vendimi i papritur i shefit ekzekutiv të Bayernit, Oliver Kahn, dhe drejtorit sportiv Hasan Salihamixhiq për të shkarkuar Julian Nagelsmannin dhe për ta zëvendësuar atë me Tuchelin, po vihet nën vëzhgim pas eliminimit të ekipit nga Kupa e Gjermanisë nga Freiburg të martën.

Një penallti në kohën shtesë ishte gjithçka që iu desh Bayernit për të humbur 2:1 në shtëpi dhe për të parë mundësinë e një titulli të 21-të rekord të kësaj gare të zhduket përsëri për një vit tjetër. Bayerni gjithashtu pësoi eliminime të turpshme në dy sezonet e fundit.

Tuchel, skuadra e të cilit do të përballet sërish me Freiburgun në Bundesligë, tha se nuk kishte asnjë mënyrë për të “korrigjuar” humbjen e së martës, por një tjetër humbje ndaj skuadrës së trajnerit Christian Streich të shtunën mund ta lejojë Borussia Dortmundin të rimarrë kryesimin në ligë me një fitore në shtëpi ndaj Union Berlinit, ndeshje kjo që luhet në të njëjtën kohë.

Çdo gjë përveç një fitoreje për Bayernin në Freiburg do të ngjallte biseda për një krizë te bavarezët disa ditë përpara se të vizitojë Manchester Cityn për ndeshjen e parë çerekfinale të Ligës së Kampionëve. Kahn dhe Salihamixhiq ishin të gatshëm për Tuchelin duke i dhënë skuadrës një tronditje përpara ndeshjeve të tilla vendimtare pasi Bayerni humbi në udhëtim te Bayer Leverkusen në ndeshjen e fundit të Nagelsmann në krye. Por kishte pak kohë që ish-trajneri i Chelseat, Paris Saint-Germainit dhe Borussia Dortmundit, të bënte ndryshime në strukturën e Nagelsmann. Bayerni mposhti Dortmundin 4:2 në ndeshjen debutuese Tuchelit, kur dukej se mbrojtja ishte më shumë prioritet sesa në kohën e paraardhësit të tij. Bayern ishte më dominues ndaj Freiburgut, por u përpoq të krijonte raste të pastra kundër mbrojtjes së përkushtuar të mysafirëve, më pas pësoi në fund. Tuchel ishte i pakënaqur me mbrojtjen e ekipit të tij që çoi në penallti dhe tha se lojtarët e tij duhet “të jenë më të qëndrueshëm, më të ashpër”. Megjithatë, ankesat ishin të njëjta me ato Nagelsmannit pas humbjeve me Leverkusenin dhe Borussia Moennchengladbachun, ose barazimet me Leipzigun, Koelnin dhe Eintracht Frankfurtin, menjëherë pas pushimit dimëror që e lejoi Dortmundin të rikthehej në garën për titull. Dortmundi gjithashtu duhet të korrigjohet pasi u eliminua nga kupa prej Leipzigut të mërkurën. Skuadra e trajnerit Edin Terziq ishte me fat që humbi vetëm 2:0 derisa përjetoi disfatën e dytë rresht duke përfshirë edhe atë që e pësoi në ligë në Munich. Dortmundi ishte i pamposhtur më parë në 10 ndeshje në ligë në vitin 2023. Tashmë jashtë Ligës së Kampionëve, Dortmundi ka vetëm Bundesligën për të luajtur, megjithëse do të mbështetet në favoret e rivalëve kundër Bayernit nëse do t'i japë fund dominimit 10-vjeçar të gjigantit bavarez.

“Ne e shohim mundësinë para nesh në javët e ardhshme”, tha Terziq. “Kjo do të thotë se ne do të luftojmë për çdo fitore dhe nëse arrijmë të fitojmë çdo ndeshje, atëherë ka një shans të mirë që të jemi kampion të Gjermanisë”.