Trepça ilegale humb miqësoren me Partizanin e Beogradit

Klubi që veten e quan “Trepça” (TREPČA), po përgatitet në Zlatibor të Serbisë për edicionin e ardhshëm të garave.

Ky klub, që në përbërje ka lojtarë të komunitetit serb, bën gara në një ligë të Serbisë, ndonëse ndeshjet si vendas i luan në Kosovë, në afërsi të Mitrovicës.

Të enjten “Trepça” luajti një ndeshje miqësore me Partizanin e Beogradit. Ndeshja u luajt në Zlatibor, kurse u fitua nga skuadra e madhe beogradase me rezultatin 2:0.

Në fakt Trepça e vërtetë ka selinë në stadiumin “Adem Jashari” dhe garon në Ligën e Parë të Kosovës në futboll. Në Mitrovicë është edhe Trepça ’89 që garon në Superligën e Kosovës në futboll.

Klubi që pa të drejtë mbanë emrin e madh “Trepça”, thirret në traditën e këtij klubi e po ashtu luan me fanella tradicionale të “xehetarëve”, gjelbër e zi. Trepça llogaritet prej klubeve me historinë më të pasur në Kosovë.

Aktiviteti i Trepçës ilegale konfirmon telashet që ka FFK-ja dhe federatat tjera sportive të vendit për të shtrirë ‘autoritetin” në gjithë territorin. Edhe shteti e ka këtë problem.