Botsuana ka një superyll të ri të atletikës. Letsile Tebogo ka fituar titullin e botës në 100 metra sprint për grupmoshën U-20, duke e thyer rekordin e botës për këtë grupmoshë.
Ai vrapoi të martën mbrëma në Cali të Kolumbisë, 9.91 sekonda, ndërsa në metrat e fundit ishte ngadalësuar paksa dhe kishte filluar të tallej me kundërshtarët.
Shumë po e krahasojnë Tebogon me legjendën e sprintit Usain Bolt, rekordmenin aktual të botës në 100 dhe 200 metra, si dhe kampionin e shumëfishtë olimpikë.
Krahasimet mes Tebogos 19-vjeçar dhe Boltit po bëhen për dy arsye: e para për aftësitë e tij atletike dhe e dyta për talljet e tij gjatë garës.
Në finale të martën mbrëma Tebogo startoi furishëm, ndërsa 30 metra pa përfunduar nisi të festonte. Tebogo përmirësoi rekordin e botës për U-20 që e kishte vendosur para pak javëve në Botërorin për të rritur në Oregon. Kishte vrapuar 9.94 sekonda.
Në finalen e të martës mbrëma ai la prapa vetes xhamajkanin Bou]ahjgie Nkrumie (10.02) dhe jugafrikanin Benjamin Richardson (10.12).
“Qëllimi ishte të triumfojë dhe ta shijojë garën. Nëse dikush e ka marrë këtë si mosrespekt, atëherë më vjen keq. E pash se tifozët po e shijonin garën dhe doja t’ua kujtoja ditët e Usain Boltit. Ai është idhulli im”, ka thënë Tebogo.
