Bremen, 11 prill – Ndeshja ishte thuajse e mbyllur, kur një rast i mirë u paraqit për Werderin. Derisa RB Leipzigu po udhëhiqte 3:0, Kevin Kampl i kësaj skuadre luajti me dorë në zonë. Arbitri Florian Badstuebner akordoi penallti, ndërsa trajneri i Werderit, Florian Kohfeld bëri të qartë se kush duhet të realizojë penalltinë.
“Raketë, ti”, u dëgjua nga të gjithë të thotë Kohfeldt.
Te Werderi, “raketë” i drejtohen Milot Rashicës, reprezentuesit të Kosovës, shkruan “kicker.de” të dielën.
Kohfeldt ishte i vendosur ta ndihmonte lojtarin e tij dhe pa rastin te penalltia. Rashica nuk kishte realizuar gol që nga 27 qershori i vitit të kaluar. Kalimi i kësaj shterpësie është i rëndësishëm për Rashicën, por njëjtë edhe për Werderin.
“Po”, u përgjigj trajneri Kohfeldt, kur pas ndeshjes u pyet nëse qëllimi i tij ishte që penalltinë t’ia jepte Rashicës.
Edhe
Rashica shënon gol, por pëson disfatë të thellë
Te Werderi janë tre lojtarë që shënojnë penalltitë. Niclas Fuellkrugg nuk ishte në skuadër të shtunën në disfatën 4:1 nga RB Leipzig. Davie Selke ishte në fushë e po ashtu Rashica, që u aktivizua në fillim të pjesës së dytë.
“Në atë moment kam pasur ndjenjën se gjëja më e rëndësishme për ‘raketën’ është të shënojë. Kam shpresuar për këtë”, ka treguar Kohfeldt.
Te Werderi shpresojnë që gola tjerë të shënohen në vazhdim të edicionit në Bundesligë nga Rashica. Goli i parë, ndonëse vetëm nga pika e bardhë dhe në një humbje të thellë, shpresojnë të jetë pikë kthese.
“Ia vlen të provojmë”, ka thënë Kohfeldt.
Se Rashica është golashënues i spikatur, e ka dëshmuar në dy edicionet e kaluar. Në një edicion kishte shënuar tetë gola e në një tjetër nëntë. Por këtë edicion ka pasur telashe të gjejë rrugën drejt portës.
Te Werderi e vlerësojnë shumë të rëndësishme që 24-vjeçari të realizoi gola. Rashica ende është kandidat për t’u shitur në verë. Klubit i duhen para. Ai ka pesë asistime, por disa gola deri në fund do të bënin që interesimi të rritej më shumë. Edhe vlera e Rashicës në treg po ashtu.
Edhe
Kohfeldt shpreson në ringjalljen e Rashicës
Trajneri Kohfeldt ka lavdëruar në javët e fundit Rashicën. Ka vlerësuar punën e tij në repartin defansiv, krijimin e mundësive. Por golat mungonin.
“Shpresoj që ky gol do t’i japë një shtytje Rashicës”, ka theksuar trajneri i Werder Bremenit.
