Te Maroku kërkojnë më shumë, triumfin në Botëror

Futbollistët e Marokut janë maksimalisht të motivuar përpara ndeshjes gjysmëfinale me Francën që zhvillohet të mërkurën mbrëma.

Trajneri i Marokut, Walid Gregragui ka thënë se ekipi i tij është plotësisht i gatshëm të përballet me kampionen në fuqi, të cilën po synon ta eliminojë në këtë fazë të turneut.

Regragui nuk kërkon vetëm eliminimin e Francës në gjysmëfinale, por ka zbuluar se synimet e Marokut janë ta fitojë titullin e botës.

“Ne duam ta fitojmë këtë Kupë të Botës. Këto nuk janë vetëm fjalë, pasi në të ardhmen mund të mos e kemi një mundësi të tillë. Do të luajmë me të gjitha forcat tona dhe do ta kërkojmë fitoren e radhës”, është shprehur Regragui.

Po ashtu, ai ka zbuluar se ekipi i tij nuk ka përgatitur asnjë plan të veçantë për Kylian Mbappen, i cili është golashënuesi më i mirë i turneut të Katarit me pesë gola të shënuara.

Ai shtoi se për sulmuesin francez do të kujdeset bashkëlojtari i tij te PSG-ja, Achraf Hakimi.